काबूल : जगाला आपल्याबरोबर चांगले संबंध ठेवण्यास आवाहन करणारा तालिबान (Taliban) आपल्याच देशातील नागरिकांशी क्रूरतेने वर्तणूक करताना दिसत आहे. तपास नाक्यावर न थांबल्याने तालिबान्यांनी एका ३३ वर्षीय तरुण डाॅक्टरचा जीव घेतला. स्थानिक प्रसारमाध्यमातील बातम्यांनुसार ही घटना (Kabul) अफगाणिस्तानच्या हेरात प्रांतात घडली आहे. प्रसारमाध्यमांशी बोलताना मृताचे कुटुंबीय म्हणाले, पोलिस तपासनाक्यावर (चेकपाँईट) न थांबल्याने ३३ वर्षीय अमरुद्दीन नूरी यांना तालिबान्यांनी ठार केले. सूत्रांनी दिलेल्या माहितीनुसार, नुरी एका छोटा खासगी दवाखाना चालवत होता आणि नुकताच त्यांचा विवाह झाला होता. (Afghanistan News)

तालिबानने अफगाणिस्तानची राजधानी काबूलवर १५ ऑगस्ट रोजी ताबा मिळविला होता. तालिबानने सत्तेत येताच दावा केला होता की अफगाणिस्तानातील सर्वसामान्यांच्या जीवनाचे संरक्षण केले जाईल. मात्र वास्तवात परिस्थिती उलटी आहे. तालिबान सत्तेत आल्यानंतर नागरिकांवरील क्रूर घटना वाढल्या आहेत. पत्रकारांसह महिलांवरील हल्ल्यांच्या अनेक घटना घडल्या आहेत.