काबूल : सत्ता बळकावून दहा दिवस होत आले तरी परदेशी नागरिकांप्रमाणेच अफगाणिस्तान सोडण्यास सामान्य नागरिकही अधीर बनले आहेत. या पार्श्वभूमीवर अधिकाऱ्यांना कामावर परतण्याचे फर्मान तालिबानने काढले. वेडे परदेशी निघून जात आहेत. ते गेल्यावर तुम्ही कामावर परता, असे बजावण्यात आले. अमेरिकेसह पाश्चात्त्य देशांचा पाठिंबा असलेल्या सरकारसाठी हजारो अधिकाऱ्यांनी काम केले. आपल्यावर सूड उगवला जाईल अशा भीतीने ते अफगाणिस्तान सोडण्यास कसून प्रयत्न करीत आहेत.

अर्थ खात्यातील तज्ज्ञ अश्रफ हैदरी चिंताग्रस्त होऊन घरी बसले होते. त्याचवेळी त्यांना तालिबानच्या एका कमांडरचा फोन आला. देश चालविण्यासाठी मदत व्हावी म्हणून कामावर परतण्याचा आदेश त्याला देण्यात आला, मात्र तालिबान्यांनी सूड उगविला तर आपला बळी जाईळ अशी भीती त्यांना वाटत आहे. देशातील ३४ प्रांतांना निधी वितरित करण्याचे काम हैदरी यांच्याकडे आहे. ते ४७ वर्षांचे आहेत. अनाठायी भीती बाळगू नका किंवा गायब होऊ नका. वेडे परदेशी गेल्यावर देश चालविण्यासाठी अधिकाऱ्यांना तुमची गरज आहे, असे तालिबानी कमांडरने सांगितल्याची माहिती त्यांनी दिली.

सत्तेवरील पहिल्या कार्यकाळात तालिबानने कडक इस्लामी कायदे राबविले होते. तेव्हा हैदरी यांना दाढी वाढविली होती. रविवारी दूरध्वनी आल्यानंतर नव्या साहेब मंडळींना भेटण्यासाठी हैदरी यांनी सूटाऐवजी पारंपरिक अफगाण पोशाख घातला. कुटुंबीयांचे धाबे दणाणून जाऊ नयेत म्हणून त्यांनी सोमवारी घर सोडताना कामावर जात असल्याचे त्यांना सांगितले नाही.

कार्यालयात काय घडले याविषयी हैदरी म्हणाले की, तीन तालिबानी अधिकाऱ्यांनी माझे स्वागत केले. लवकरच माझे इतर सहकारी सहभागी होतील, प्रांतांना निधी पाठविण्यावर तुम्ही लक्ष केंद्रित करावे असे मला सांगण्यात आले. सुरक्षेची सूत्रे असलेल्या एका अधिकाऱ्याने नमाजसाठीची सुट्टी अनिवार्य असल्याचे सांगितले. कार्यालयाच्या इमारतीत त्यांनी बंदुका आणल्या नव्हत्या. तुमच्या अनुभवातून आम्हाला शिकता येईल असे त्यांच्यापैकी एक जण म्हणाला. काही सहकारी देशबांधव देश सोडण्यास अधीर झाले असताना हैदरी यांनी थांबण्याचे ठरविले आहे.