Jalgaon News : श्रावण महिना संपायला अवघे काही तास शिल्लक असतानाच गोठ्यात बांधलेल्या ९ बकऱ्यांसह ११ बोकड चोरट्यांनी रात्रीतून चोरुन नेले. नांद्रा बुद्रुक (ता. जळगाव) येथे हा प्रकार उघडकीस आला.

श्रावण मासात मटण-मासे खाणे बंद असताना उपलब्धतेनुसार दरही नियंत्रणात होते. मात्र, श्रावण संपत आला असताना चिकन, मटण आदींच्या मागणीत वाढ होत आहे. परिणामी, गाव-खेड्यांतील पशुधन चोरीला जावु लागले आहे. (9 goats and 11 bucks stolen from Nandra Budruk jalgaon news)

नांद्रा बुद्रुक गावात चांदसर रस्त्यावर विजय श्रावण बाविस्कर व रवींद्र प्रकाश वाघ या पशुपालकांचा गोट फार्मवजा गोठा आहे. शनिवारी (ता. ९) रात्री आठला त्यांनी आपल्या बकऱ्या व बोकड गोठ्यात बांधले होते.

त्यानंतर ते घरी आले. दुसऱ्या दिवशी रविवारी (ता. १०) सकाळी सातच्या सुमारास चोरट्याने नऊ बकऱ्या व ११ बोकड असे तब्बल लाख रुपयांचे पशुधन चोरुन नेल्याचे आढळून आले. त्यांनी सर्वत्र विचारपुस व शोध घेतला; परंतू कोणतीही माहिती मिळाली नाही.

त्यानंतर बाविस्कर यांनी तालुका पोलिस ठाण्यात धाव घेत तक्रार दिली. त्यानुसार अज्ञात चोरट्यांविरोधात गुन्हा दाखल झाला असून, पोलिस नाईक ईश्‍वर लोखंडे तपास करीत आहेत.

हेही वाचा : Credit Card फसवणूक....काय घ्याल काळजी?

कोबंडे-बोकडची वाढली मागणी

श्रावण महिन्यामुळे गेल्या महिनाभर जिभेवर नियंत्रण ठेवणाऱ्या खवैय्यांना केव्हा श्रावण संपतो, याचेच वेध लागले आहे. त्यातच येत्या १९ सप्टेंबरपासून गणेशोत्सव सुरू होत आहे. त्यामुळे गुरुवारी (ता. १४) दर्श आमवस्येनंतर शुक्रवार व रविवारी सामिष जेवणाच्या पार्ट्यांचे नियोजन अनेकांनी केले आहे.

हॉटेल्समध्येही बुकींग सुरु झाले असून, मटणासाठी बोकड आणि चिकनसाठी कोंबड्यांची मागणी वाढली आहे. वाढत्या मागणीला संधी समजुन गाव-खेड्यांतून कोंबड्या, बोकड, बकऱ्या चोरीच्या घटना सातत्याने घडत आहेत. दरम्यान, पोलिसही अनेक वेळा तक्रार न घेता अर्जावरच वेळ मारुन नेत असल्याचे सांगण्यात आले.