अमळनेर : अमळनेरात (amalner) भल्या पहाटे युवकाचा खून झाल्याची घटना उघडकीस आली आहे. प्रकाश दत्तू चौधरी रा.जुना पारधी वाडा (वय ३४) याचा मृतदेह शहरातील मध्यभागी असलेल्या नगरपालिकेच्या हशीमजी प्रेमजी संकुलाच्या वरच्या माळ्यावर आढळून आला. मृतदेहाच्या बाजूला रक्ताचा सडा पडलेला होता, मध्यरात्री किंवा भल्या पहाटे धारदार शस्त्राने गळा चिरून खून झाल्याचा अंदाज आहे. मृतदेह शव विच्छेदनासाठी ग्रामीण रुग्णालयात नेला असून, त्यातून काही गोष्टी उघडकीस येतील. आर्थिक देवाणघेवाणीतून खून झाल्याची माहिती समोर आली आहे.

मयत प्रकाश चौधरी यांच्या वडिलांच्या फिर्यादीवरून संशयित कैलास शिंगाने याच्याविरुद्ध अमळनेर पोलिस स्थानकात गुन्हा दाखल केला होता. शिंगाने याला मयत चौधरी याने १ लाख रुपये दोन वर्षांपासून दिलेले असतांना तो ते परत करत नव्हता यातून दोघांमध्ये नेहमी भांडण होत होते. त्यातच कैलास शिंगाने यांच्या दुकानासमोरच खून झाल्याने त्यावर पोलिसांचा संशय बळावला होता.

संकुलात शालेयस्तरापासून पासून तर महाविद्यालयाचे शिकवणी वर्ग मोठ्या प्रमाणात सुरू असतात. विद्यार्थ्यांच्या नजरेला सर्वात प्रथम मृतदेह पडल्याचे समजते. उपविभागीय पोलीस अधिकारी राकेश जाधव यांच्या सुचनेनुसार सहाय्यक पोलीस निरीक्षक राकेशसिंग परदेशी, हेड कॉन्स्टेबल सुनील हटकर, मिलिंद भामरे यांच्या पथकाने शिंगाने याच्या घरी जाऊन त्याच्या पत्नीला विचारपूस केली असता कैलास शिंगाने बाहेरगावी असल्याचे समजले. अधिक तपासात तो चोपड्याला फरार झाला असल्याची माहिती मिळाली, यावरून पोलीस पथकाने त्याचा पाठलाग करत त्याला चोपड्यातून ताब्यात घेतले. आरोपीने गुन्हा कबुल केला असून अधिक माहिती चौकशीतून निष्पन्न होईल.