जळगाव : पंतप्रधान नरेंद्र मोदींबद्दल (PM Narendra Modi)आक्षेपार्ह वक्तव्य करणाऱ्या काँग्रेसचे प्रदेशाध्यक्ष नाना पटोले यांचा भाजपने तीव्र शब्दांत निषेध केला आहे. पटोलेंवर गुन्हा (Nana Patole)दाखल करुन त्यांना अटक करावी, अशी मागणी भाजप जिल्हा महानगर व ओबीसी मोर्चातर्फे करण्यात आली. यासंदर्भात आमदार सुरेश ऊर्फ राजूमामा भोळे यांच्या नेतृत्वात पदाधिकाऱ्यांनी पोलिस अधीक्षक प्रवीण मुंढे यांना निवेदन दिले.

पंतप्रधानांबद्दल बेताल वक्तव्य करणाऱ्या नाना पटोले यांच्या विरुद्ध त्वरित फौजदारी गुन्हा दाखल करून त्यांना अटक करावी. अन्यथा भाजपा ओबीसी मोर्चा तीव्र आंदोलन करण्यात येईल, असा इशारा देण्यात आला. या वेळी महानगर अध्यक्ष दीपक सूर्यवंशी, ओबीसी मोर्चाचे जिल्हा महानगराध्यक्ष जयेश भावसार, नगरसेवक राजू मराठे, उपाध्यक्ष अमित भाटिया, चिटणीस राहुल वाघ आदी उपस्थित होते.