जळगाव : प्रेमविवाह केल्याच्या रागातून पत्नीच्या नातेवाईकांनी पतीसह कुटुंबीयांना मारहाण करून जखमी केल्याची घटना घडली. इतकेच नाही तर घराबाहेर उभ्या रिक्षाची तोडफोड करून नुकसान केले आहे. एमआयडीसी पोलिस ठाण्यात सात जणांविरोधात गुन्हा दाखल करण्यात आला आहे.

शहरातील लक्ष्मीनगर परिसरातील रहिवासी भावेश रमेश गोसावी (वय २२) पत्नी जागृती व कुटुंबीयांसह वास्तव्याला आहे. भावेशने जागृतीशी प्रेमविवाह केला आहे. त्यामुळे जागृतीचे नातेवाइकांच्या मनात त्याचा प्रचंड राग होता. रविवारी (ता. १५) भावेश हा पत्नी व नातेवाईकांसोबत रिक्षाने विशाल पेट्रोल पंपाजवळील गुलाबाबा कॉलनी रोडवरील नर्सरी समोरून जात असताना गजेंद्र घुगे-पाटील, निलेश राजेंद्र घुगे, दुर्गेश गजेंद्र घुगे, निखिल राजेंद्र घुगे, तुषार राजेंद्र घुगे आणि जितेंद्र घुगे-पाटील यांच्यासह इतर २ ते ३ जण (सर्व रा. लक्ष्मीनगर जळगाव) अशांनी त्यांची रिक्षा अडवून भावेशसह त्याची आई व नातेवाइकांना बेदम मारहाण करून जखमी केले. तर, रिक्षाची तोडफोड करून नुकसान केले. त्यानंतर भावेशची पत्नी जागृती हिला बळजबरी घेऊन गेले. भावेश गोसावी याने एमआयडीसी पोलीसात धाव घेत तक्रार दिली. त्यांच्या तक्रारीवरून एमआयडीसी पोलिस ठाण्यात गुन्हा दाखल करण्यात आला आहे. पुढील तपास पोलिस नाईक नितीन पाटील करीत आहे.