पारोळा (जि. जळगाव) : येथील बसस्थानकात रविवारी (ता. १५) मध्यरात्री एका व्यक्तीच्या डोक्यात प्लॅस्टिकची कचराकुंडी टाकून मारहाण करण्यात आली होती. त्याचा मंगळवारी (ता. १७) उपचारादरम्यान मृत्यू झाला. संशयिताविरुद्ध खुनाचा गुन्हा दाखल करण्यात आला आहे.

तिलकचंद मांगिलाल डांगी (वय ३०, रा. रवंजे, ता. एरंडोल) हे पारोळा बसस्थानकात मध्यरात्री झोपण्यासाठी आले. ते आरडाओरड करीत असताना समोर असलेल्या कमलेश नाना मिस्त्री (वय ३०, रा. पाठक गल्ली, पारोळा) याने संतापाच्या भरात प्लॅस्टिकची कचराकुंडी उचलून त्याच्या डोक्यात मारून जखमी केले. रात्री गस्तीवर असलेल्या पोलिसांनी प्रकाराची शहानिशा केली व आरोपीस ताब्यात घेतले. जखमीस पारोळा कुटीर रुग्णालयात दाखल केले व तेथून पुढील उपचारार्थ खासगी रुग्णालयात दाखल केले असता मंगळवारी त्यांचा मृत्यू झाला. पोलिसात कमलेश मिस्त्री याच्या विरोधात खुनाचा गुन्हा दाखल करण्यात आला.