जळगाव : शहरातील हरीविठ्ठलनगर, धनगरवाडा परिसरात गावठी पिस्तूल (Pistol) घेवुन दहशत माजविणाऱ्या तरुणास रामानंदनगर पोलिसांनी अटक (Arrest) केली. त्याच्या जवळून गावठी पिस्तूल जप्त (Seized) करण्यात आली असून गुन्हा दाखल झाला आहे. (Police arrest youth with pistol Jalgaon Crime news)

रामानंदनगर पोलिसांनी दिलेल्या माहितीनुसार, हरीविठ्ठलनगरातील धनगरवाडा परिसरात एक तरुण विनापरवाना गावठी पिस्तूल व जिवंत काडतूस घेत फिरत असल्याची गोपनीय माहिती रामानंदनगर पोलिस ठाण्याचे पोलिस निरीक्षक विजय शिंदे यांना मिळाली. त्यानुसार कारवाई करण्यासाठी सहाय्यक पोलिस निरीक्षक रोहिदास गभाळे, संजय सपकाळे, सुशिल चौधरी, जितेंद्र तावडे, सागर देवरे, महिला पोलिस कर्मचारी स्वाती बागे, रवींद्र चौधरी अशांच्या पथकाने रात्री ८.३० वाजता कारवाई करत संशयित आरोपी प्रवीण विनोद शिंदे (वय २१ रा. धनगरवाडा, हरीविठ्ठलनगर) याला ताब्यात घेतले. त्याकडून २० हजार रुपये किमतीचा गावठी पिस्तूल आणि एक जिवंत काडतूस जप्त करण्यात आले. याबाबत रात्री उशिरा रामानंदनगर पोलिस ठाण्यात प्रवीण शिंदे याच्या विरोधात गुन्हा दाखल झाला.