जळगाव : शिरसोली रोडवरील विनोबानगरात शेजारी राहणाऱ्या दोन भावांसह कुटुंबियांमध्ये रिक्षा लावण्यावरून शिवीगाळ व मारहाण झाली. उमेश लालसिंग परदेशी आणि निखिल लालसिंग परदेशी हे दोन्ही भाऊ शेजारी शेजारी राहतात.

सोमवारी (ता. २०) सायंकाळी सहाच्या सुमारास निखिल परदेशी यांनी त्यांची रिक्षा घराच्या गेटसमोर पार्क केली. या कारणावरून शेजारी राहणारा भाऊ उमेश परदेशी आणि त्याची पत्नी मेघा परदेशी यांनी शिवीगाळ करून मारहाण केली, तर प्रतिकार म्हणून निखिल परदेशी आणि त्याची पत्नी अपेक्षा परदेशी यांनीही दोघांना शिवीगाळ करून मारहाण केली. याबाबत दोन्ही कुटुंबियांनी एमआयडीसी पोलिसांत रात्री साडेदहाला तक्रार दिली. त्यावरून परस्पर विरोधात चौघांवर गुन्हे दाखल झाले आहेत. पोलिस नाईक नितीन पाटील तपास करीत आहे.