Aditya Thackeray Kokan Daura: गोव्यात फिल्‍म फेस्टीव्हल सुरू आहे. तेथे सिने कलाकारांसोबत नाचण्यासाठी आदित्‍य ठाकरे येत आहेत. त्‍यामुळे ठाकरेंच्या सिंधुदुर्गातील खळा बैठका हा निव्वळ बहाणा आहे.

ठाकरेंचे खरंच सिंधुदुर्ग जिल्ह्यावर प्रेम आहे की, बॉलीवूडच्या लोकांसोबत त्‍यांना पार्टी करायची आहे, अशी टीका आमदार नीतेश राणे यांनी आज केली.

ते म्‍हणाले, ‘‘आदित्‍य ठाकरे यांचा गोवा कोकण दौरा आणि गोव्यात सुरू असलेला फिल्‍म फेस्टिव्हल यामध्ये काहीतरी साम्‍य असल्‍याचे दिसत आहे.

ठाकरेंचे खरंच सिंधुदुर्गवर प्रेम आहे की गोव्यातील फिल्‍म फेस्टिव्हलमध्ये हजेरी लावून बॉलीवूड लोकांसोबत त्‍यांना पार्टी करायची आहे. ज्‍यांची संघटना खिळखिळी झाली त्‍यांना आता खळा बैठकी शिवाय दुसरा पर्याय राहिलेला नाही.’’

राणे पुढे म्‍हणाले, ‘‘एक दिवसीय जागतिक क्रिकेट स्पर्धेच्या अंतिम सामन्यात भारताचा पराभव झाला. या मुद्यावर बोलताना राहुल गांधी यांनी ‘पनवती’ हा शब्‍द वापरला; पण १९ नोव्हेंबरला तर इंदिरा गांधी यांची जयंती होती. त्‍यादिवशी भारत जिंकायला हवा होता.

त्‍यामुळे ‘पनवती’ शब्द बोलताना त्‍यांनी भान ठेवावे. अंतिम सामना हरल्‍यानंतर पंतप्रधान मोदी यांनी भारतीय खेळाडूंचे मनोधैर्य वाढविण्याचे काम केले. एक नेता कसा असावा याचा आदर्श त्‍यांनी घालून दिला आहे.’’