वेंगुर्ले : इन्स्टाग्रामवर (Instagram) झालेल्या मैत्रीतून दिल्लीतील अल्पवयीन मुलगी थेट येथे आपल्या मित्राकडे राहायला आली. या प्रकाराने पोलिसही चक्रावले. दिल्ली पोलिसांकडून मिळालेल्या माहितीनंतर येथील पोलिसांनी तिला ताब्यात घेत एका निवारा केंद्रात ठेवले.

यानंतर दिल्ली पोलिसांचे (Delhi Police) पथक येथे दाखल होत संशयित जावेद मकानदार (वय ३६, रा. वेंगुर्ले, पिराचा दर्गा) याला ताब्यात घेतले. संबंधित अल्पवयीन मुलगी नवी दिल्लीतील आहे. तिची वेंगुर्लेतील एका ३६ वर्षीय तरुणाशी इन्स्टाग्रामवर मैत्री झाली.

यातून ती त्याच्याकडे राहण्यासाठी थेट वेंगुर्लेत पोहोचली. तिच्या नातेवाइकांनी नॉर्थ वेस्ट, दिल्ली जहांगीरपुरी येथील पोलिस ठाण्यात बेपत्ताची तक्रार दिली. दिल्ली पोलिसांनी तपास सुरू केला.

यावेळी ती वेंगुर्लेत असल्याची माहिती त्यांना मिळाली. त्यांनी येथील पोलिसांशी संपर्क साधला. पोलिस निरीक्षक अतुल जाधव यांनी संबंधितांकडे चौकशी केली. यानंतर खात्री पटल्यावर पोलिसांनी तिला ताब्यात घेतले.