कणकवली : गेल्‍या दोन दिवसांत मनसे (MNS) कार्यकर्त्यांनी हातीवले टोल नाका व पाली खानूमधील महामार्ग ठेकेदाराचे कार्यालय फोडले. यानंतर सिंधुदुर्ग पोलिसांनी सतर्कता बाळगून ओसरगाव टोल नाक्‍याला (Osargaon Toll Plaza) संरक्षण दिले आहे.

पाच पोलिस अधिकाऱ्यांसह तब्‍बल पन्नास पोलिसांनी टोल नाक्‍यावर कडक बंदोबस्त ठेवला आहे. पनवेल येथे बुधवारी (ता. १६) मनसेचा निर्धार मेळावा झाला. यात मनसेचे प्रमुख राज ठाकरे (Raj Thackeray) यांनी मुंबई-गोवा महामार्ग रस्त्याच्या स्थितीबाबत चिंता व्यक्‍त केली होती.

ठाकरेंच्या भाषणानंतर आक्रमक मनसे कार्यकर्त्यांनी हातीवले टोल नाक्‍याची तोडफोड केली. त्‍यानंतर पाली खानू येथील महामार्ग ठेकेदाराचे कार्यालय देखील फोडले. दरम्यान, ओसरगाव टोल नाक्‍यावर काल सकाळपासून कडक बंदोबस्त ठेवण्यात आला.

एक पोलिस निरीक्षक, चार सहाय्यक पोलिस निरीक्षकांसह राखीव दलाची एक तुकडी आणि इतर पोलिस असा पन्नास जणांचा बंदोबस्त तैनात आहे. दरम्‍यान, सिंधुदुर्ग पोलिस अधीक्षक सौरभ अग्रवाल यांनीही सायंकाळी ओसरगाव टोल नाक्‍याला भेट देऊन बंदोबस्ताची पाहणी केली.

टोलनाका नेहमीच वादाचा मुद्दा

सिंधुदुर्गातील ओसरगाव टोल नाका हा नेहमीच वादाचा मुद्दा ठरला आहे. येथे दोन वेळा टोल वसुली सुरू करण्यात आली; मात्र सर्वपक्षीय आंदोलनानंतर ती थांबविण्यात आली. आता मनसे आंदोलनाची ओसरगाव टोल नाक्‍यावर पुनरावृत्ती टाळण्यासाठी सिंधुदुर्गची पोलिस यंत्रणा सतर्क झाली आहे.