-rat३p२३.jpg-
२५N७५०२१
रत्नागिरी ः जिल्हा परिषद मुख्य कार्यकारी अधिकारी वैदेही रानडे यांच्या बैठकीला उपस्थित विविध विभागाचे कर्मचारी.
------------
शाळाबाह्य मुले ‘सप्टेंबर ते मे’ अखेर शोधा
वैदेही रानडे ः स्थलांतरित कुटुंबे येण्याचा काळ
सकाळ वृत्तसेवा
रत्नागिरी, ता. ३ ः जिल्ह्यातील शाळाबाह्य मुलांची सर्वेक्षण मोहीम फक्त पंधरा दिवसांपुरतीच न ठेवता वर्षभर राबवावी. आंबा व मासळी हंगामात म्हणजेच सप्टेंबर ते मे या कालावधीत परजिल्ह्यातील किंवा परराज्यातील स्थलांतरित कुटुंबे कोकणात येतात. त्यांची मुले शिक्षणापासून वंचित राहू नयेत याची शिक्षण विभागाने काळजी घ्यावी, अशा सूचना जिल्हा परिषद मुख्य कार्यकारी अधिकारी वैदेही रानडे यांनी दिल्या.
जिल्हा परिषदेत पार पडलेल्या बैठकीला शिक्षण विभागाचे अधिकारी, पोलिस कर्मचारी आदी उपस्थित होते. प्राथमिक शिक्षण विभागाने १ ते १५ जुलैदरम्यान सर्वेक्षण करण्याचा निर्णय घेतला आहे. त्यानुसार जिल्ह्यात सर्वेक्षण करण्यात येणार आहे. शाळाबाह्य मुलांना शिक्षणाच्या प्रवाहात आणण्याचा प्रयत्न जिल्हा प्रशासन करणार आहे, असे रानडे यांनी सांगितले. शाळेत न जाणाऱ्या किंवा अनियमितपणे शाळेत जाणाऱ्या मुलांसाठी सर्वेक्षण केले जाते. शाळेत न जाणाऱ्या मुलांना शाळेत परत आणण्यासाठी किंवा शिक्षण पूर्ण करण्यासाठी आवश्यक साह्य केले जाते. आर्थिक अडचणीमुळे किंवा कुटुंबाच्या जबाबदाऱ्यांमुळे काही मुले शाळेत जाऊ शकत नाहीत. त्यांच्यासाठी ही मोहीम उपयुक्त ठरत आहे. त्यांना शैक्षणिक साहित्य, गणवेश किंवा इतर आवश्यक वस्तू मोफत दिल्या जातात. शिक्षण विभागाकडून हे सर्वेक्षण जिल्ह्यातील गावागावांत, रेल्वेस्टेशन परिसर, झोपडपट्टी परिसर, विविध बांधकामे, सार्वजनिक ठिकाणे, बाजारपेठा, बसस्थानकं आदी ठिकाणी करण्यात येणार आहे. सप्टेंबरनंतर खाण कामगार आणि मासळी हंगाम तर डिसेंबरनंतर आंबा हंगाम सुरू होतो. त्यासाठी परराज्यातून, परप्रांतांतून मजूर, कामगार येत असतात तसेच महाराष्ट्राच्या अन्य जिल्ह्यातील कामगारही येतात. त्यांच्या मुलांनाही शिक्षण मिळावे यासाठी प्रयत्न केले जाणार आहेत. ही जबाबदारी गटशिक्षणाधिकारी यांच्याकडे तर शहरातील नगरपालिका शिक्षण विभागाकडे सोपवण्यात आली आहे.
---
गतवर्षी १८ मुले शिक्षणाच्या प्रवाहात
गतवर्षी जिल्ह्यातील विविध भागांतील १८ शाळाबाह्य मुलांना शाळेत दाखल करून घेण्यात आले. त्यातील १० मुले यावर्षीही शाळेत दाखल झालेली आहेत; मात्र उर्वरित ८ मुलांचा संपर्क झालेला नाही. ती मुले नेपाळ, कर्नाटक आणि आंध्रप्रदेशहून आलेल्या कुटुंबामधील होती. कामाच्या निमित्ताने आलेली असल्याने ती पुन्हा आपापल्या भागात रवाना झाली असावीत, असा अंदाज वर्तवला जात आहे.
---