एशियन गेम्समध्ये भारताची घोडदौड सुरू आहे. आज सकाळपासून कित्येक स्पर्धांमध्ये खेळाडूंनी पदकं जिंकली आहेत. महिला हॉकी संघानेही आपली सुरुवात सिंगापूरला व्हाईट वॉश देऊन केली आहे.

भारतीय महिला हॉकी संघाने सिंगापूरचा 13-0 एवढ्या फरकाने धुव्वा उडवला आहे. भारताच्या संगीता कुमारीने गोल्सची हॅटट्रिक केली. तर, नवनीत कौरने दोन गोल केले. याव्यतिरिक्त दीपिका, सुशिला चानू, उदिता, नेहा, दीप ग्रेस एक्का, सलीमा तेते, वंदना कटारिया आणि मोनिका या सर्वांनी एक-एक गोल केला.

पहिल्या पंधरा मिनिटांमध्येच भारत 5-0 ने आघाडीवर होता. त्यानंतर पुढील क्वार्टरमध्ये सिंगापूरने चांगली टक्कर दिली. तरीही भारताने आणखी तीन गोल केले. त्यानंतर पुढच्या क्वार्टरमध्ये सिंगापूरने आक्रमक पवित्रा घेत गोल्स करण्याचा प्रयत्न केला. मात्र त्यांना यश मिळाले नाही. या क्वार्टरमध्ये भारताने आणखी एक गोल केला.

शेवटच्या क्वार्टरमध्ये भारताने जोरदार मुसंडी मारत आणखी चार गोल केले. सिंगापूरला संपूर्ण मॅचमध्ये गोल करण्याची संधी न देता भारताने 13-0 अशा फरकाने ही मॅच खिशात घातली. आता महिलांच्या हॉकी संघाची पुढील मॅच मलेशिया विरुद्ध असेल. हा सामना 29 सप्टेंबर रोजी होणार आहे.