Australia vs Pakistan Sydney Test : क्रिकेट ऑस्ट्रेलियाने रविवारी 31 डिसेंबर रोजी पाकिस्तानविरुद्धच्या तिसऱ्या आणि अंतिम कसोटीसाठी 13 खेळाडूंचा संघ जाहीर केला आहे. सिडनी येथे खेळल्या जाणाऱ्या या कसोटी सामन्यासाठी ऑस्ट्रेलियाने आपल्या संघात कोणताही बदल केलेला नाही.

एमसीजी कसोटीचा भाग असलेल्या याच 13 खेळाडूंची तिसऱ्या कसोटीसाठी निवड करण्यात आली आहे. मेलबर्नमध्ये पाकिस्तानला 79 धावांनी पराभूत करून ऑस्ट्रेलियाने मालिकेत 2-0 अशी अभेद्य आघाडी घेतली होती, आता 3 जानेवारीपासून सुरू होणारा शेवटचा सामना जिंकून यजमानांचा पाकिस्तानचा सूपडा साफ करण्याकडे लक्ष असेल.

ऑस्ट्रेलियन प्रशिक्षक अँड्र्यू मॅकडोनाल्ड यांनी नुकतेच संकेत दिले होते की, सिडनी कसोटीत संघ ज्या बॉलिंग युनिटसह मेलबर्नला उतरला होता त्याच बॉलिंग युनिटसह तो उतरेल.

पुढील महिन्यात ऑस्ट्रेलियन निवडकर्त्यांना मोठा निर्णय घ्यावा लागणार आहे. संघाला 17 जानेवारीपासून वेस्ट इंडिजविरुद्ध पहिली कसोटी खेळायची आहे. या मालिकेत उस्मान ख्वाजासोबत डावाची सलामी कोण देणार हा सर्वात मोठा प्रश्न आहे.

खरं तर, नियमित सलामीचा फलंदाज डेव्हिड वॉर्नर सिडनीमध्ये पाकिस्तानविरुद्धची शेवटची कसोटी खेळणार आहे. आणि लाल चेंडूच्या क्रिकेटला अलविदा करणार आहे. अशा परिस्थितीत मार्कस हॅरिस, कॅमेरॉन बॅनक्रॉफ्ट आणि मॅट रेनशॉ हे त्याच्या जागी प्रतिस्पर्धी सलामीच्या फलंदाजांच्या यादीत आघाडीवर आहेत, तर निवडकर्त्यांनी ही भूमिका पार पाडण्यासाठी ग्रीन किंवा इतर कोणत्याही खेळाडूला आणण्याची शक्यता नाकारली नाही.

मुख्य निवडकर्ते जॉर्ज बेली म्हणाले, 'आम्ही कसोटी मालिकेत पाकला क्लीन स्वीप करू पाहत आहे, त्यामुळे मेलबर्न ते सिडनी हाच संघ कायम ठेवला आहे. डेव्हिड वॉर्नरचा शेवटचा कसोटी सामना आणि त्याच्या घरच्या मैदानावर त्याची अविश्वसनीय कारकीर्द साजरी करण्यासाठी आम्ही उत्सुक आहोत.

सिडनी कसोटीसाठी ऑस्ट्रेलियन संघ : पॅट कमिन्स (कर्णधार), स्कॉट बोलँड, अॅलेक्स कॅरी, कॅमेरॉन ग्रीन, जोश हेझलवूड, ट्रॅव्हिस हेड, उस्मान ख्वाजा, मार्नस लॅबुशेन, नॅथन लियॉन, मिच मार्श, स्टीव्ह स्मिथ, मिचेल स्टार्क, डेव्हिड वॉर्नर.