Ind vs Eng 2nd Test: भारतीय संघाने पहिल्या डावात ३६४ धावांपर्यंत मजल मारली. रोहित शर्माच्या ८३ आणि लोकेश राहुलच्या १२९ धावांच्या दमदार खेळीमुळे भारताला ३५०चा आकडा पार करता आला. प्रत्युत्तरात इंग्लंडच्या जो रूटने १८० धावांची झुंजार खेळी केली. रूटच्या दीडशतकी फटक्यामुळे इंग्लंडला पहिल्या डावात २७ धावांची आघाडी मिळाली. बुमराहची गोलंदाजी फारशी परिणामकारक ठरली नाही, पण नवख्या सिराजने चार गडी बाद केले. स्विंग बॉलिंगचे उत्तम उदाहरण पेश करत त्याने आपली छाप उमटवली. मात्र चांगली कामगिरी करूनही त्याच्यावर एका मुद्द्यावर टीका केली जात आहे. या टीकेला त्याने उत्तर दिले.

विकेट मिळवल्यानंतर प्रत्येक गोलंदाज आपल्या पद्धतीने ती विकेट साजरी करतो. नवखा गोलंदाज सिराज विकेट मिळाल्यानंतर फलंदाजाच्या दिशेने पाहत तोंडावर बोट ठेवून शट-अप म्हटल्यासारखं सेलिब्रेशन करतो. यावरून त्याच्यावर अनेकांनी टीका केली. जेव्हा तुम्ही विकेट मिळवता त्यावेळी तुम्ही युद्ध जिंकलेलं असतं. मग अशा वेळी तुम्ही पुन्हा फलंदाजाला डिवचण्याची गरज काय? असा काहींनी सवाल केला होता. या साऱ्या टीकांना आणि सवालांना त्यांनी उत्तर दिलं.

चार गडी बाद केल्यानंतर सिराजला विचारण्यात आलं की तू शट-अप सेलिब्रेशन का करतोस? त्यावर तो म्हणाला, "मी जे सेलिब्रेशन करतो त्याचा फलंदाजांशी संबंध नसतो. माझ्यावर काही लोक पूर्वी टीका करत होते. मी चांगली गोलंदाजी करू शकत नाही असं त्यांचं म्हणणं होतं अशा लोकांना मी ते उत्तर देत असतो. अनेक टीकाकार म्हणतात की नवखा सिराज काय करून दाखवणार... त्या साऱ्या टीकाकारांना माझ्या गोलंदाजीने उत्तर देण्याच्या दृष्टीने मी विकेट घेतल्यावर तसं सेलिब्रेशन करतो असं सिराजने स्पष्ट केलं."

"इंग्लंडच्या पिचवर वेगवान गोलंदाजांना कायमच चांगली मदत मिळते. अशा पिचवर वेगवान गोलंदाज महत्त्वाची कामगिरी बजावतात. आम्ही ठरवून ठराविक भागातच गोलंदाजी करत होतो. एकाच ठिकाणी टप्पा ठेवण्याचा आमचा प्रयत्न होता. रणजी करंडक खेळताना जसा प्लॅन करून मी गोलंदाजी करायचो तशीच शिस्तबद्ध गोलंदाजी करण्याचा प्रयत्न मी यावेळीही करतोय. फार काही विचार न करता सरळ, साधी आणि एका टप्प्यावर गोलंदाजी करणे हाच माझा अतिशय साधा प्लॅन होता", असंही तो म्हणाला.