त्रिनिदाद आणि टोबॅगो: आयसीसी १९ वर्षाखालील वर्ल्डकपमध्ये (ICC Under 19 World Cup 2022) भारताने आयरलँडवर १७४ धावांनी दणदणीत विजय मिळवला. भारताकडून जरी हरनूर सिंगने ८८ धावांची सर्वात मोठी खेळी केली असली तरी सामन्यात षटकारांचा तडका लावण्यात मराठमोळा राजवर्धन हंगरगेकर (Rajvardhan Hangargekar) आघाडीवर होता. त्याने फक्त १७ चेंडूत ३९ धावांची धमाकेदार खेळी करत भारताला ३०० चा टप्पा ओलांडून दिला होता. (Rajvardhan Hangargekar Hat Trick Of Sixes)

19 वर्षाखालील वर्ल्डकपच्या (U19 World Cup) दुसऱ्या सामन्यात भारत आयरलँडसमोर (India vs Ireland) २७० ते २८० धावांचे टार्गेट सेट करेल असे वाटत होते. मात्र पाचव्या क्रमांकावर फलंदाजीला आलेल्या राजवर्धन हंगरगेकरने (Rajvardhan Hangargekar) फक्त १७ चेंडूत ३९ धावांची खेळी करत भारताला ३०० च्या पार पोहचवले. त्याने या आपल्या आतशी खेळीत तब्बल ५ षटकार खेचले तर एक चौकार लगावला. म्हणजे त्याने आपल्या ३९ धावांपैकी ३४ धावा या षटकार आणि चौकारांनीच केल्या.

हंगरगेकरने आयरलँडच्या ४९ व्या षटकात डावखुऱ्या नॅथन मॅकगायरची धुलाई केली. त्याने त्याच्या षटकात दोन षटकार खेचले. त्यानंतर त्याने आयरलँडचा वेगवान गोलंदाज मुजामिल शेरजादला टार्गेट केले. त्याने शेरजादच्या एका षटकात षटकारांची हॅट्ट्रिक केली.