न्यूझीलंडमध्ये सुरु असलेल्या महिला वर्ल्ड कप स्पर्धेत पाकिस्तान महिला संघाचा संघर्ष सुरुच आहे. भारतीय महिला संघाकडून मोठ्या फरकाने मार खाल्ल्यानंतर आता त्यांना सलग तिसऱ्या पराभवाला सामोरे जावे लागले आहे. दक्षिण आफ्रिके विरुद्धच्या सामन्यात पाकिस्तान महिलांनी सामना शेवटच्या षटकापर्यंत नेला. पण अखेरच्या षटकात तीन विकेट्स गमावल्यामुळे त्यांच्या पदरी पुन्हा पराभव आला.

पहिल्यांदा बॅटिंग करताना दक्षिण आफ्रिका महिला संघाने निर्धारित 50 षटकात 229 धावा केल्या होत्या. आफ्रिकेकडून व्लावरदत (Wolvaardt) हिने सर्वाधिक 75 धावा केल्या. तिच्याशिवाय कर्णधार सुने लुइस Sune Luus (c) हिने संयमी 62 (102) अर्धशतक झळकावले. या दोघींच्या खेळीच्या जोरावरच दक्षिण आफ्रिका महिला संघाने 229 धावांपर्यंत मजल मारली होती.

या धावांचा पाठलाग करताना पाकिस्तानी महिला संघाची सुरुवात खराब झाली. अमीन अवघ्या 12 धावा करुन तंबूत परतली. सलामीची बॅटर नाहिदा खान (Nahida Khan) हिने 40 धावा करुन संघाचा डाव सावरला. बिस्माह मारुफला खातेही उघडता आले नाही. त्यानंतर ओमैमा सोहिल ( Omaima Sohail) आणि निडा दार (Nida Dar) या दोघींनी सामन्याची सूत्रे आपल्या हाती घेतली. दोघींनी अर्धशतकी भागीदारी पूर्ण केल्यानंतर सोहिल 65 धावांवर बाद झाली. निडा दार जोपर्यंत मैदानात होती तोपर्यंत पाकिस्तानला विजयाची आस होती.

पण ती 49 व्या षटकातील दुसऱ्या चेंडूवर रन आउट झाली. दक्षिण आफ्रिकेनं फिल्डिंगच्या जोरावर सामना फिरवला. जर ही विकेट पडली नसती तर कदाचित निडा दारनं आपल्या संघाला पहिला विजय मिळवून दिला असता. आयाबोनगा हिच्या गोलंदाजीवर स्ट्राइकवर असलेल्या डायनानं उत्तम फटका खेळला. त्यानंतर दुहेरी धाव घेण्याचा पाकिस्तानी महिलांचा मनसूबा आफ्रिकनं महिलांनी उधळून लावला. सीमा रेषेवरुन ट्रायन हिने जबरदस्त थ्रो केला. गोलंदाजीला असेलल्या खाकाने चेंडू पकडत चपळाईनं स्टम्प उडवल्या.