IND vs ENG: इंग्लंड विरुद्धच्या तिसऱ्या कसोटी सामन्यात भारतीय संघाला 76 धावांसह डावाने पराभूत होण्याची नामुष्की ओढावली. या सामन्यातील विजयासह यजमान इंग्लंडने मालिकेत 1-1 बरोबरी साधली आहे. भारत आणि इंग्लंड यांच्यातील तिसऱ्या कसोटी सामन्याच्या निकालानंतर वर्ल्ड टेस्ट चॅम्पियनशिप पॉइंट टेबलमध्ये (ICC World Test Championship Points Table) मोठा उलटफेर झालाय.

इंग्लंड विरुद्धच्या सामन्यातील पराभवामुळे भारतीय संघाची पहिल्या क्रमांकावरुन थेट तिसऱ्या स्थानावर घसरण झालीये. भारताच्या खात्यात आता 14 गुण आहेत. भारतीय संघाच्या विजयाची टक्केवारी ही 38.88 असून ती पाकिस्तानपेक्षाही कमी आहे. भारत आणि इंग्लंड यांच्यातील पाच सामन्यांची मालिका ही दुसऱ्या वर्ल्ड टेस्ट चॅम्पियशिपचा भाग आहे. लॉर्डसवरील विजयानंतर मिळालेले अव्वलस्थान टीम इंडियाने अल्पावधीतच गमावले आहे.

भारत आणि इंग्लंड या दोन संघांसह पाकिस्तान आणि वेस्ट इंडिज यांनी वर्ल्ड टेस्ट चॅम्पियशिप 2023 च्या दुसऱ्या हंगामाची सुरुवात केलीये. चारही संघाच्या खात्यात प्रत्येकी एक-एक विजयाची नोंद झालीये. इंग्लंडच्या संघ विजयानंतर चौथ्या स्थानावरच आहे.

पाकिस्तान आघाडीवर

वर्ल्ड टेस्ट चॅम्पियनशिपच्या अंतर्गत पाकिस्तान संघाने दोन कसोटी सामने खेळले आहेत. यातील 1 सामन्यातील विजय आणि 1 सामन्यातील पराभवानंतर पाकिस्तानच्या खात्यात 12 गुण जमा आहेत. भारतीय संघापेक्षा त्यांच्या खात्यात दोन गुण कमी असले तरी मॅच विनिंग पर्सेंटेज 50 असल्यामुळे गुणतालिकेत त्यांनी आघाडीचे स्थान गाठले आले.

वर्ल्ड टेस्ट चॅम्पियनशिपसंदर्भातील नियम

कसोटी सामना जिंकणाऱ्या संघाला 12 गुण दिले जातात. सामना अनिर्णित राहिल्यात प्रत्येकी संघाला 4-4 गुण दिले जातात. या नियमावलीनुसार, भारत आणि इंग्लंड यांच्या खात्यात 16 गुण जमा व्हायला पाहिजे होते. पण सध्याच्या घडीला दोन्ही टीमच्या खात्यात 14-14 गुण आहेत. नॉटिंघमच्या मैदानात झालेल्या पहिल्या कसोटी सामन्यात दोन्ही संघावर षटकांची गती कमी ठेवल्याचा आरोप झाला होता. त्यामुळे दोन्ही संघांना प्रत्येकी 2-2 गुण कपात करण्यात आले होते.