जयसिंगपूर- भारतीय महिला क्रिकेट संघाची उपकर्णधार स्मृती मानधना हिने संजय घोडावत विद्यापीठात बी.कॉम. प्रथम वर्षासाठी प्रवेश घेतला आहे. याबाबतची माहिती घोडावत विद्यापीठाचे विश्वस्त विनायक भोसले यांनी दिली.

भोसले म्हणाले, ‘स्मृती मानधनाने बी.कॉम. प्रवेशासाठी संजय घोडावत विद्यापीठाची निवड केली हा आमच्यासाठी गौरव आहे. तिच्या शैक्षणिक गुणवत्ता वाढीसाठी सर्वतोपरी मदत करू.’ संस्थेचे अध्यक्ष संजय घोडावत यांनी स्मृती मानधना हिचे येथील प्रवेशाबद्दल स्वागत केले. विद्यापीठाच्या शिरपेचात हा हिरा गवसल्याची भावना त्यांनी व्यक्त केली.

ते म्हणाले, ‘विद्यापीठ नेहमीच क्रीडा क्षेत्रात प्रावीण्य मिळवणाऱ्या विद्यार्थ्यांना पाठबळ देते. यापूर्वी अठरा वर्षांखालील गटात लॉन टेनिस प्रकारात आंतरराष्ट्रीय पातळीवर खेळणाऱ्या ऐश्वर्या जाधव हिला

आम्ही प्रवेश देऊन सर्वतोपरी मदत करत आहोत. येथील क्रीडापटू ऑलिम्पिक स्पर्धेत भारताचे प्रतिनिधित्व करतील. विद्यापीठाची घोडदौड सर्वोत्कृष्टतेकडे होत आहे.’

कुलगुरू डॉ. अरुण पाटील, कुलसचिव डॉ. विवेक कायंदे, घोडावत पॉलिटेक्निकचे प्राचार्य विराट गिरी, वाणिज्य आणि व्यवस्थापन अधिष्ठाता डॉ. योगेश्वरी गिरी यांनीही स्मृती मानधनाचे स्वागत केले.

संजय घोडावत विद्यापीठ हे आंतरराष्ट्रीय पातळीवरचे क्रीडा व शैक्षणिकदृष्ट्या उत्कृष्ट सोयीनियुक्त विद्यापीठ आहे. या परिसरात आल्यानंतर एक सकारात्मक ऊर्जा मिळते. येथे क्रीडापटूंसाठी उत्तम क्रीडा साधने व क्रीडांगण उपलब्ध असल्याने या विद्यापीठात प्रवेश घेण्याचे निश्चित केले.

- स्मृती मानधना, उपकर्णधार, भारतीय महिला क्रिकेट संघ