World Cup 2023 Reschedule : बीसीसीआयने अखेर वनडे वर्ल्डकप 2023 चे सुधारित वेळापत्रक जाहीर केले. सुरक्षेच्या कारणास्तव अहमदाबाद येथील भारत - पाकिस्तान आणि कोलकाता येथील इंग्लंड - पाकिस्तान सामन्याची तारीख बदलावी लागली. मात्र ही तारीख बदलताना बीसीसीआयला एकूण 9 सामन्यांच्या वेळापत्रकात बदल करावा लागला आहे.

त्यातच आयसीसीने भारत आणि न्यूझीलंड सामना धरमशाळा येथे खेळवण्यावरून नाराजी व्यक्त केली होती. मात्र बीसीसीआयने आयसीसीच्या या नाराजीला केराची टोपली दाखवली आहे. भारत आणि न्यूझीलंड यांच्यातील सामना धरमशाळा येथेच 22 ऑक्टोबरला खेळवला जाणार आहे. (India Vs New Zealand Dharamshala)

बीसीसीआयने जरी आपलं मत रेटलं असलं तरी आयसीसी आणि काही चाहत्यांनी देखील भारत आणि न्यूझीलंड हा मोठा सामना धरमशाळा येथील छोट्या स्टेडियमध्ये खेळवण्याबाबत नाराजी व्यक्त केली. बीसीसीआयच्या ढिसाळ नियोजनावर आयसीसी आणि चाहत्यांनी राग व्यक्त केला आहे.

धरमशाळा येथील स्टेडिमय हे भारत - न्यूझीलंड यासारख्या हाय व्होल्टेज सामन्याच्या मानाने छोटं आहे. त्याची आसनक्षमता फक्त 23 हजार इतकीच आहे. आयसीसीच्या व्यावसायिक विभागाने याबाबत तीव्र नाराजी व्यक्त केली होती. यामुळे मोठ्या उत्पन्नावर पाणी सोडावे लागणार असल्याचे मत त्यांनी व्यक्त केले.

मात्र बीसीसीआयने दादागिरी करत आपले म्हणणे रेटले आहे. धरमशाळा येथील भारत - न्यूझीलंड सामना ठरल्याप्रमाणे होणार असल्याचे सांगितले. मात्र आर्थिक फटका बसणार असल्याने आयसीसी याबाबत नाराज आहे.

बीसीसीआयने काल (दि. 9) वनडे वर्ल्डकप 2023 चे सुधारित वेळापत्रक जाहीर केले. नव्या वेळापत्रकानुसार 9 सामन्यांच्या तारखेत बदल करण्यात आला आहे. भारत - पाकिस्तान यांच्यातील 15 ऑक्टोबरला होणारा सामना हा आता 14 ऑक्टोबरला होणार आहे.

याचबरोबर इंग्लंड - अफगाणिस्तान यांच्यातील 14 ऑक्टोबरला होणारा सामना 15 ऑक्टोबरला खेळवण्यात येणार आहे. पाकिस्तान आणि श्रीलंका यांच्यातील सामन्याची देखील तारीख बदलली आहे. 12 ऑक्टोबरला होणारा हा सामना आता 10 ऑक्टोबरला होणार आहे.

ऑस्ट्रेलिया आणि दक्षिण आफ्रिका यांच्यातील लखनौ येथे होणारा तगडा सामना देखील आता 13 ऑक्टोबरऐवजी 12 ऑक्टोबरला होणार आहे.

(Sports Latest News)