Diwali Car Care Tips : दिवाळी हा आनंदाचा आणि समृद्धीचा सण असला तरी फटाक्यांची एक ठिणगी मोठ्या अपघातास कारणीभूत ठरू शकते. त्यात पार्किगच्या समस्येमुळे अनेकांच्या कार मोकळ्या जागेतच उभ्या करतात. आज आम्ही दिवाळीच्या मुहूर्तावर कोणते कशाप्रकारे फटाक्यांपासून कारचे रक्षण करता येईल या विषयी माहिती सांगणार आहोत.

वाहन कव्हर करून ठेवू नका

दिवाळीच्या दिवशी तुमची गाडी कधीही कव्हर किंवा इतर कोणत्याही वस्तूने झाकून ठेवू नका. कारण गाडीचे कव्हर त्वरीत आग लागेल अशा मटेरियलपासून बनलेले असते. कव्हरमुळे आग लागण्याचा धोका वाढतो. यामुळे लाखो रुपयांची कार क्षणार्धात जळून राख होऊ शकते. त्यामुळे दिवाळीच्या दिवशी एखाद्या बंद ठिकाणी कार पार्क करावी आणि हे शक्य नसल्यास मोकळ्या जागेत पार्क करताना कव्हर वापरू नये.

सीएनजी कारची घ्या विशेष काळजी

जर तुमच्याकडे सीएनजी कार असेल तर, तुम्हाला इतर कारच्या तुलनेत अधिकची खबरदारी घेणे गरजेचे आहे. कारण पेट्रोलच्या तुलनेत सीएनजीला जास्त वेगाने आग लागते. कारमध्ये बसवलेल्या सीएनजी टँकमुळे मोठा स्फोट होण्याबरोबरच आग लागू शकते. त्यामुळे जर तुमच्याकडे सीएनजी कार असेल तर, शक्यतो जेथे फटाके फोडले जाणार नाहीत अशा ठिकाणी कार पार्क करा. हीच खबरदारी दुचाकी आणि तीनचाकी वाहनांसाठीही घ्यावी.

गाडीवर दिवा लावू नका

दिवाळीच्या दिवशी लोक वाहनांचीदेखील पूजा करतात. पूजा करताना घाईगडबडीत अनेकांकडून दिवा ठेवला जातो. असे केल्याने चुकीने दिवा पडल्यास गाडीला आग लागण्याचा धोका अधिक असतो. त्यामुळे गाडीची पूजा करताना दिवा ठेवणे टाळा.