कोल्हापूर : ‘यापूर्वीच्या निवडणुकीतील जुना राग काढण्याचा खासदार शरद पवार (Sharad Pawar) यांचा डाव आहे. त्यातूनच त्यांनी शाहू महाराज (Shahu Maharaj) यांना माझ्याविरोधात रिंगणात उतवरण्याचे षड्‌यंत्र केल्याचा आरोप खासदार संजय मंडलिक यांनी पत्रकारांशी बोलताना केला.

खासदार मंडलिक (Sanjay Mandlik) म्हणाले, ‘पवार हे देशाचे मोठे नेते आहेत. त्या काळात त्यांच्या विरोधात दिवंगत सदाशिवराव मंडलिक (Sadashivarao Mandalik) होते. तेवढा मोठा मी नाही. शाहू महाराज यांची निवडणुकीची इच्छा होती का नाही हे मला माहिती नाही; पण पवार यांना जुना कोणता तरी राग काढायचा असेल का याबाबत कल्पना नाही. जर रागच काढायचा असेल तर जनता दाखवून देईल.’

‘आज दुपारपर्यंत महायुतीच्या उमेदवारांची घोषणा होण्याची शक्यता आहे. उमेदवार म्हणून मी रिंगणात उतरणार आहे. निवडणुकीची तयारी म्हणून माझ्या कार्यकर्त्यांनी काल मेळावा घेतला. माझ्या उमेदवाराची घोषणा झाल्यानंतर कार्यकर्ते कामाला लागतील. माझी उमेदवारी घोषित नसल्याने मी कालच्या मेळाव्याला उपस्थित नव्हतो. उमेदवारी घोषित झाल्यानंतर महायुतीतील सर्व नेत्यांना घेऊन मी मेळावा घेणार असल्याचे मंडलिक यांनी स्पष्ट केले.

महायुतीच्या उमेदवाराबाबत कोल्हापुरात अजूनही संभ्रम आहे. त्यावर बोलताना मंडलिक म्हणाले, ‘युतीतल्या प्रत्येक पक्षाला वाटते की माझ्या विचाराचा माणूस या शाहूंच्या भूमीतून निवडून यावा. जर उमेदवारीवरून वावड्या उठल्या तरी मी गैर समजत नाही. निवडणुकीच्या काळात हे होतच असते. खासबाग मैदानात एखाद्या मल्लाची कुस्ती असेल तर त्या मल्लाला सराव देण्यासाठी तालमीतील सर्व मल्ल आखाड्यात उतरत असतात. त्याच पद्धतीने या वावड्या म्हणजे सरावाच्या कुस्त्या आहेत.’

‘मागील निवडणुकीत ते माझ्या स्टेजवर होते. या निवडणुकीला ते माझ्या स्टेजवर येतील असे मी का म्हणू नये?,’ असा प्रश्‍न मंडलिक यांनी काँग्रेसचे जिल्हाध्यक्ष सतेज पाटील यांच्याविषयी विचारलेल्या प्रश्‍नाला उत्तर देताना उपस्थित केला. ‘ही निवडणूक देशाचे भवितव्य ठरवणारी आहे. व्यक्तिगत हेव्यादाव्यांवर ही निवडणूक घेऊन जाऊ नये’, असे आवाहनही त्यांनी केले.

सरोदे ज्योतिषी आहेत का?

आमदार प्रकाश आबिटकर ठाकरे गटाकडे परत येणार असल्याचा गौप्यस्फोट ॲड. आसिम सरोदे यांनी केला, त्यावर प्रा. मंडलिक म्हणाले,‘सरोदे हे ज्योतिषी आहेत का? आबिटकर हे विकासासाठी झटणारे आमदार आहेत. माझ्या उमेदवारीसाठी ते प्रयत्न करणाऱ्यांपैकी एक आहेत. ते निश्चितच आमच्या सोबत असतील ते दुसरीकडे जाण्याचा विचार करणार नाहीत.’