कोल्हापूर : लोकसभा निवडणुकीत (Kolhapur Loksabha Election) श्रीमंत शाहू छत्रपती महाराज (Shahu Chhatrapati Maharaj) यांना बळ द्या’, असे आवाहन युवराज संभाजीराजे छत्रपती यांनी येथे केले. न्यू पॅलेस परिसरात आयोजित कार्यकर्त्यांच्या बैठकीत ते बोलत होते. यावेळी श्रीमंत शाहू छत्रपती महाराज, युवराज्ञी संयोगिताराजे छत्रपती, व शहाजीराजे छत्रपती प्रमुख उपस्थित होते.

संभाजीराजे (Sambhajiraje Chhatrapati) म्हणाले, ‘शिव-शाहूंच्या विचारधारेने महाराज काम करत आहेत. जनमानसात जाऊन काम करण्याची त्यांची पद्धत सर्वश्रुत आहे. जिल्ह्याच्या विकासाला गती देण्यासाठी त्यांना पाठबळ देणे गरजेचे आहे. त्यासाठी कार्यकर्त्यांनी कामाला लागणे आवश्यक आहे. सर्वांना सोबत घेऊन काम कसे करावे, हे महाराजांकडून शिकण्यासारखे आहे. ते शिस्तप्रिय असून, उत्तम मॅनेजमेंट गुरू म्हणून त्यांचा लौकिक आहे. जिल्ह्यातील प्रश्नांची त्यांना नेमकेपणाने जाण असून, ते सोडवण्याची ताकदही त्यांच्याकडे आहे.’

संयोगिताराजे म्हणाल्या, ‘सामान्य कार्यकर्त्याला बळ देणारे महाराज आहेत. आता घरोघरी जाऊन त्यांचा जिल्ह्याच्या विकासाचा विचार पोहोचविणे आवश्यक आहे.’ यावेळी राष्ट्रवादीचे जिल्हाध्यक्ष व्ही. बी. पाटील, करणसिंह गायकवाड, हिंदकेसरी विनोद चौगले, महाराष्ट्र केसरी विष्णू जोशीलकर उपस्थित होते. फत्तेसिंह सावंत यांनी प्रास्ताविक केले. संजय पोवार यांनी स्वागत केले.

सोशल मीडियावरून प्रचाराची झलक

‘संकल्प बोलके हम तो निकल पडे.. हरद्वार खोलके गगनकहे... विजयी भव !’ या गीताची जोड घेवून श्रीमंत शाहू छत्रपती महाराज यांचे सोशल मीडियावर जोरदार प्रदर्शन केले आहे. श्रीमंत शाहू महाराजांच्या नावे इन्स्टाग्राम, फेसबुकवरही अकाऊंट दिसत आहे.महायुती आणि महाविकास आघाडीचे ‘कोल्हापूर’ आणि ‘हातकणंगले’ लोकसभा मतदार संघातील उमेदवार अद्याप अधिकृत जाहीर झाले नाहीत. तरीही संभाव्य उमेदवार म्हणून श्रीमंत शाहू महाराजांचे नाव कॉंग्रेसकडून पुढे आले आहे.