पंढरपूर : आषाढी एकादशीनिमित्त मुख्यमंत्री एकनाथ शिंदे यांच्या हस्ते आज पंढरपूर इथं विठ्ठल-रुक्मिणीची शासकीय महापूजा संपन्न झाली. या महापूजेनंतर मुख्यमंत्र्यांनी विठुरायाला साकडं घातलं.

'बळीराजाला चांगले दिवस येऊ देत, शेतकऱ्यांना कष्टकऱ्यांना चांगले दिवस येऊ देत. राज्यात पाऊस चांगला पडू दे. राज्य सुजलाम सुफलाम होऊ दे, असं मागणं मुख्यमंत्री शिंदेंनी विठ्ठलाच्या चरणी मागितलं.

दरम्यान मुख्यमंत्री म्हणाले, इथं आल्यावर माझ्याकडं विचारणा झाली की, पंढरपूरच्या विकास आराखड्याचं काय झालं? मी स्पष्टपणे सांगतो की, पंढरपूरचा विकास आराखडा कोणालाही डावलून पुढं करणार नाही. सर्वांना विश्वासात घेऊन निर्णय होईल.

सर्वांचा विचार करून प्रकल्प पुढं नेले जातील. पंढरपूर विकास आराखडा बनवताना कोणाची नाराजी राहणार नाही यासाठी सरकार प्रयत्नशील असेल. आमच्याकडून विविध शासकीय निर्णय घेतले जाताहेत. महात्मा फुले जन आरोग्य योजनेत यापुढं दीड लाखांची मर्यादा आता पाच लाखांची असेल असा आजच्या मंत्रिमंडळात ऐतिहासिक निर्णय घेतला.

१५ लाख वारकऱ्यांचा एक लाखाचा विमा काढला. सरकार म्हणून हे आमचं कर्तव्य आहे. गेल्या अडीच वर्षाची काम रखडली होती ती आता पुढे सुरू झाली आहेत. विठ्ठल रुक्मिणी मंदिर समितीच्या कर्मचाऱ्यांसाठी सहावा वेतन आयोग केला. पंढरपूरच्या रस्त्यासाठी १०८ कोटी मान्यता दिलीये, असंही मुख्यमंत्र्यांनी सांगितलं.