राज्यात गेल्या काही दिवसांपासून मराठा आरक्षणावरुन राज्यातील राजकारण चांगलंच तापलं होतं. राज्यभरात मराठा आरक्षणाच्या मागणीसाठी आंदोलने, उपोषणे, रास्ता रोको करण्यात येत होते. सरकारने मराठा आरक्षणाच्या निर्णयासाठी काही वेळ मागितला आहे. तर येत्या २४ डिसेंबरपर्यंत आरक्षणाचा निर्णय घ्या, असा अल्टिमेटम जरांगे यांनी सरकारला दिला आहे. त्यामुळे कुणबी प्रमाणपत्राबाबत सरकार काय निर्णय घेणार, याकडे सर्वांचं लक्ष लागलं असतानाच भाजप नेते गिरीश महाजन (Girish Mahajan) यांनी मनोज जरांगे पाटील यांच्या मागणीवरून एक मोठं विधान केलं आहे.

'मराठा समाजाला सरसरकट कुणबी प्रमाणपत्र देता येणं शक्य नाही', असं वक्तव्य गिरीश महाजन यांनी केलं आहे. ज्यांच्या नोंदी सापडल्या, त्यांनाच कुणबी प्रमाणपत्र देण्यात येईल, असंही महाजन यावेळी म्हणाले आहेत. महाजन यांच्या या वक्तव्यामुळे पुन्हा एकदा मराठा समाज आक्रमक होण्याची शक्यता आहे. यावर मनोज जरांगे पाटील आज दौऱ्यादरम्यान काय प्रतिक्रिया देणार? हे देखील पाहणं महत्वाचं आहे.

काय म्हणाले गिरीश महाजन?

'मनोज जरांगे पाटील जेव्हा उपोषणाला बसले होते. तेव्हा मी त्यांना भेटण्यासाठी गेलो होतो. मराठा समाजाला सरसकट कुणबी प्रमाणपत्र देता येणं शक्य नाही, हे मी त्यावेळीच स्टेजवरून सांगितलं होतं.'

'ज्या लोकांच्या कुणबी नोंदी आढळल्या आहेत, त्यांची तपासणी करून त्यांना कुणबी प्रमाणपत्र देण्याचा निर्णय सरकार घेईल. जेवढ्या लोकांच्या नोंदी सापडल्या आहे, त्यांना सरकार कुणबीचा दाखला देत आहे. पण कुठल्या कायद्यानुसार देणार? कुठल्या नियमानुसार देणार? हा देखील मोठा प्रश्न आहे', असंही गिरीश महाजन म्हणाले.

दरम्यान मंत्री गिरीश महाजन आणि मनोज जरांगे यांच्यात नाराजी असल्याच्या चर्चा राजकीय वर्तुळात आहेत. याबाबत बोलताना महाजन म्हणाले की, 'असे काही नाही मी जरांगेंच्या उपोषणादरम्यान चार वेळा गेलो होतो. पाचव्या वेळी गेलो नाही कारण मी बाहेरगावी होतो. मराठ्यांना आरक्षण मिळाली पाहिजे अशी आमची भूमिका आहे'.