सत्तेत आल्यानंतर लगेचच मुख्यमंत्री एकनाथ शिंदेंनी राष्ट्रवादी आणि अजित पवारांना चांगलाच दणका दिला आहे. शिंदेंनी नगरविकास विभागाच्या ९४१ कोटींच्या कामांना स्थगिती दिली आहे. यामध्ये बारामती नगरपरिषदेला मोठ्या प्रमाणावर निधी मिळाला होता. (Cm Eknath Shinde)

सध्या राज्याचं कामकाज मुख्यमंत्री एकनाथ शिंदे (Eknath Shinde) आणि उपमुख्यमंत्री देवेंद्र फडणवीस (Devendra Fadnavis) यांच्याच हाताखालून होत आहे. अजून मंत्रिमंडळाचा विस्तार न झाल्याने विभागांना मंत्री मिळालेले नाही. मुख्यमंत्री शिंदेंनी नगरविकास विभागाच्या मार्च ते जून २०२२ मध्ये मंजूर झालेल्या ९४१ कोटींच्या कामांना स्थगिती दिली आहे. यातही महत्त्वाची बाब म्हणजे काँग्रेस राष्ट्रवादीच्या आमदारांनी सुचवलेल्या कामांना स्थगिती देण्यात आली आहे.

शिवसेनेच्या आमदारांनी सुचवलेल्या कामांना मात्र मुख्यमंत्री शिंदेंनी अभय दिलं आहे. महाविकास आघाडीचं सरकार असताना अजित पवार (Ajit Pawar) निधी देत नाहीत, अशी तक्रार अनेक आमदारांनी केली होती. त्यानंतर आता शिंदेंनी सत्तेत आल्यावर हे बदल केलेलं दिसत आहे. दरम्यान, ९४१ कोटींपैकी एकट्या बारामती नगरपरिषदेला २४५ कोटींचं वितरण कऱण्यात आलं होतं. मात्र आता बारामतीतल्या कामांना स्थगिती मिळाल्याने हा अजित पवारांसाठी मोठा धक्का मानला जात आहे.