काँग्रेसचे प्रदेशाध्यक्ष नाना पटोले यांनी सध्या सीबीआयकडून चौकशी सुरू असलेले एनसीबीचे माजी आधिकारी समीर वानखेडे यांच्याबद्दल मोठा दावा केला आहे. नागपूर येथील राष्ट्रीय स्वयंसेवक संघाच्या मुख्यलयात जाऊन मोहन भागवत यांची भेट घेतल्यानंतरच समीर वानखेडे यांच्यामागे चौकशीचा ससेमिरा लागल्याचा काँग्रेसचे नेते नाना पटोले म्हणाले आहेत.

यामध्ये काहीतरी संशयास्पद असल्याचे देखील पटोले म्हणाले आहेत. त्यांच्या या दाव्यामुळे आता राजकीय चर्चांना उधाण आले आहे. (Nana Patole On Sameer Wankhede)

नाना पटोले म्हणाले की, समीर वानखेडे हे राष्ट्रीय स्वयंसेवक संघाच्या नागपूर येथील मुख्यालयात जाऊन आले. तेथे त्यांनी मोहन भागवत यांची भेट घेतली. त्यानंतर समीर वानखेडे यांच्या मागे चौकशीचा ससेमिरा लागला. याची कारणं काय आहेत? या गोष्टी जेव्हा पुढे येतील तेव्हा यामध्ये काहीतरी लपलेलं आहे हे समोर येईल.

यामध्ये काहीतरी संशयास्पद आहे. समीर वानखेडे यांच्याकडे अशा काही वस्तू आहेत ज्यामुळे संघाची आणि भाजपची पोलखोल होवू शकते असा दावा नाना पटोले यांनी केला आहे.

दरम्यान एनसीबीचे माजी अधिकारी यांच्या सुनावणीबाबत एक मोठी अपडेट समोर आली आहे. मुंबई हायकोर्टानं वानखेडे यांना दिलासा दिला आहे. मुंबई कोर्टानं वानखेडे यांना अटकेपासून संरक्षण दिले आहे.

सुत्रांनी दिलेल्या माहितीनुसार, समीर वानखेडे यांना ८ जुन पर्यत अटकेपासून संरक्षण देण्यात आले आहे. या सगळ्यात कोर्टानं काही अटी वानखेडे यांच्यासमोर ठेवल्या आहेत. त्या म्हणजे त्यांना यापुढे आर्यन खान प्रकरणाशी संबंधित कोणत्याही प्रकारचे व्हाट्स अप चॅट व्हायरल करता येणार नाही. यापूर्वी समीर वानखेडे यांनी बॉलीवूडचा किंग खान शाहरुख आणि त्यांच्यातील चॅट हे व्हायरल केल्याचे सांगण्यात आले होते. त्यावर कोर्टानं त्यांना समज दिली आहे.

समीर वानखेडे यांनी त्यांच्याकरिता पोलीस संरक्षणाची मागणी केली आहे. आपल्याला सोशल मीडियावरुन जीवे मारण्याच्या धमक्या येत आहेत. अशातच कोणताही अनुचित प्रकार घडू नये म्हणून संरक्षण मिळावे, अशी मागणी वानखेडे यांनी कोर्टाकडे केली आहे. यापूर्वी वानखेडे यांनी माध्यमांना आर्यन खान केस प्रकरणातील काही गोष्टी शेयर केल्या होत्या. त्यानंतर वेगळ्याच चर्चांना उधाण आले होते.