Eknath Shinde Dasara Melava : मुख्यमंत्री एकनाथ शिंदे यांनी दसऱ्याच्या निमित्तानं बीकेसीमध्ये शिवसेना पक्षप्रमुखांवर तीव्र शब्दांत हल्लाबोल केला आहे. यावेळी शिंदे यांचा आक्रमकपणा दिसून आला आहे. त्यांनी परखडपणे आजवर आपल्यासोबत झालेल्या अन्याय, अत्याचाराचा पाढा वाचून दाखवला आहे. त्यांनी केलेल्या वक्तव्यावर उपस्थितांनी टाळ्यांच्या कडकडाटात दाद दिली आहे. शिंदे यांनी दरवेळी आम्हाला गद्दार म्हणून का डिवचले जाते. आम्ही गद्दार नाही तर गदर करणारे आहोत. जे आमच्यावर टीका करत आहेत त्यांनीच आत्मपरिक्षण करण्याची गरज आहे.

शिंदे म्हणाले, बाळासाहेबांचे खरे वारसदार होणं म्हणजे विचारांचे वारसदार होणे, आम्ही तो जपला आहे. आम्हाला गद्दार म्हटलं जातं. याशिवाय दुसरं काही बोलायला नाही. गद्दारी झाली पण ती 2019 ला झाली. त्या निवडणूका झाल्या त्यानंतर जी आघाडी झाली त्यात गद्दारी झाली. हिंदूत्वाच्या विचारांसोबत गद्दारी झाली.

बाळासाहेबांचा फोटो आणि दुसऱ्या बाजुला पंतप्रधान नरेंद्र मोदींचा फोटो आम्ही लावला होता. आम्ही केलेली गद्दारी नाही तर हा गदर आहे. ही क्रांती आहे. तुम्ही बापाचे विचार विकले. तुम्ही तर बापालाच विकण्याचा प्रयत्न केला. सत्तेसाठी तुम्ही हिंदूत्वाला तिलांजली दिली. बघा काय हा जनसागर आहे. किती यांच्यात उत्साह आहे. खूप मोठ्या प्रमाणात लोंढे आहे. मी कुणावर टीका करणार नाही. आमचे विचार बदलले नाहीत. तुम्ही सत्तेसाठी लाचार झालात. 25 वर्षे आम्ही सडलो...

याकुब मेननचं स्मारक तुम्ही तयार केले....मुंबईकरांच्या जखमेवर मीठ चोळले. कुणी केली गद्दारी....ती तुम्ही केली....आम्ही नाही तुम्ही गद्दार आहात....आतापर्यत राज ठाकरे, नारायण राणे यांनी शिवसेना सोडली. यामागील कारण काय याचा विचार करा. तुम्हाला मुख्यमंत्री म्हणून पाच वर्षे पूर्ण करायची होती म्हणून तुम्ही शिवसेनेचे पानिपत होऊन दिले. आम्ही जो निर्णय घेतला त्यात आम्हाला फार आनंद झाला असे नाही. गेल्या अडीच वर्षांपासूनची जी खदखद होती ती बाहेर आली आहे.