मुंबई : संतोष परब हल्लाप्रकरणी (Santosh Parab Attack) भाजप आमदार नितेश राणे (BJP MLA Nitesh Rane) यांना पोलिस कोठडी देण्यात आली. त्यानंतर आज कणकवली पोलिसांनी (Kankavli Police) सकाळी दहा वाजतापासून तर सव्वातीन वाजेपर्यंत नितेश यांची चौकशी केली. आता पोलिस त्यांना गोव्याला (Goa) घेऊन गेल्याची माहिती आहे.

संतोष परब हल्लाप्रकरण मुख्य आरोपीला दिल्लीवरून अटक केल्यानंतर भाजपच्या नितेश राणेंच्या अटकेची मागणी झाली. त्यानंतर कणकवली पोलिसांनी नितेश राणेंना समन्स बजावला होता. तसेच त्यांच्या अटकेसाठी गोवा, मुंबई आणि सिंधुदुर्गात फिल्डींग लावली होती. पण, नितेश राणे कुठे होते? हे कोणालाच माहिती नव्हते. न्यायालयीन प्रक्रिया पूर्ण होईपर्यंत नितेश राणे पुढे आले नव्हते. ते गोव्यात लपून बसल्याची माहिती होती. तपासादरम्यान नितेश राणेंचं लोकेशन काय होतं? ते तिथे काय करत होते? याची चौकशी करण्यासाठी कणकवली पोलिस नितेश राणेंना घेऊन गोव्यात गेल्याची शक्यता सूत्रांनी व्यक्त केली आहे.

नेमकं काय आहे प्रकरण? -

शिवसेना कार्यकर्ते संतोष परब यांच्यावर 18 डिसेंबर 2021 रोजी झालेल्या हल्ल्याप्रकरणी नितेश राणे यांच्यावर थेटपणे संशयाची सुई आली होती. पोलीस तपासातही त्यात पुरावे सापडल्याने नितेश राणे यांच्या अडचणीत वाढ झाली होती. याप्रकरणी न्यायालयानं त्यांना दोन दिवसांची म्हणजेच ४ फेब्रुवारीपर्यंत पोलिस कोठडी सुनावली आहे. तत्पूर्वी नितेश राणे बुधवारी सकाळी कणकवली जिल्हा न्यायालयात शरण आले होते. त्यानंतर कोर्टानं त्यांना न्यायालयीन कोठडी सुनावली होती.