मुख्यमंत्री उद्धव ठाकरे यांचं सरकार हे त्यांच्याच पक्षातील शिवसैनिक आणि मंत्री (Shivsena) एकनाथ शिंदे (Eknath Shinde) यांनी अडचणीत आणलंय. काल जनतेला संबोधन करताना मुख्यमंत्री उद्धव ठाकरे (CM Uddhav Thackeray) यांनी मी आजच वर्षा बंगला सोडत असल्याची घोषणा केली होती. ही घोषणा काही तासातच खरी ठरली. त्यांनी सर्व साहित्यासह वर्षा बंगला (Varsha Bunglow) सोडलाय. ते त्यांच्या मातोश्री या निवासस्थानीच आता मुक्कामी असणार आहेत.

तर, मला कुठल्याही आमदारानं मी मुख्यमंत्री म्हणून कारभार करण्यास सक्षम नसल्याचं सांगावं, मी एका मिनिटात राजीनामा देईन, असंही मुख्यमंत्री उद्धव ठाकरे म्हणले होते. तसेच मुख्यमंत्री बोलून गेल्यानंतर एकनाथ शिंदे यांनी आपल्या चार मागण्या थेट ट्विटरवरून मुख्यमंत्र्यांसमोर ठेवल्या होत्या. यातून तर मुख्यमंत्री आणि शिंदे यांच्यात कुठेही मेळ होताना दिसत नाही, त्यामुळं मुख्यमंत्री उद्धव ठाकरे हे मुख्यमंत्रिपदही सोडणार का? असाही सवाल आता विचारण्यात येत आहे.

दरम्यान, कोणत्याही क्षणी महाविकास आघाडी सरकार (Mahavikas Aghadi Government) कोसळू शकतं, अशी स्थिती आहे. असं असताना मध्य प्रदेशच्या (Madhya Pradesh) माजी मुख्यमंत्री आणि भारतीय जनता पार्टीच्या (BJP) ज्येष्ठ नेत्या उमा भारती (Uma Bharti) यांनी मोठं विधान केलंय. सध्याची शिवसेना ही बाळासाहेब ठाकरे यांची शिवसेना नाही, हे सरकार पडायलाच हवं, असं त्यांनी म्हटलंय. उमा भारतींनी यावेळी शिवसेनेवर जोरदार टीका केलीय.

टीका करताना त्या म्हणाल्या की, महाराष्ट्रातील महाविकास आघाडी सरकार हे सडकं फळ आहे, ते पडायलाच हवं. महाराष्ट्रात स्थापन झालेलं महाविकास आघाडी सरकार चुकीच्या पद्धतीनं स्थापन झालंय. कारण, काँग्रेस आणि शिवसेना कधीच एकत्र होऊ शकत नाही. त्यामुळं ते सरकार हे सडकं फळ आहे. भाजपाला सत्तेपासून दूर ठेवणं, हाच त्यांचा एकमेव हेतू होता, असंही त्या म्हणाल्या. महाविकास आघाडीमधील शिवसेना ही बाळासाहेबांच्या विचारांची शिवसेना नाहीये, ती काँग्रेसची बी टीम असलेली शिवसेना आहे. त्यामुळं हे सरकार पडायलाच हवं, कारण ते हिंदुविरोधी आणि महिलाविरोधी सरकार आहे, असा टोलाही त्यांनी लगावलाय.