सातारा : कुणबी दाखले देण्याबाबत विधी व न्याय विभागाचे मत घेऊनच निर्णय घेतला आहे. इतर समाजाच्या आरक्षणाला धक्का न लावता मराठा समाजाला आरक्षण (Maratha Reservation) दिले जाणार आहे. या आरक्षण प्रश्नावर संवेदनशील असून, मराठा समाजाला आरक्षण मिळेपर्यंत गप्प बसणार नाही, असे मुख्यमंत्री एकनाथ शिंदेंनी स्पष्ट केले आहे.

तसेच आरक्षण मिळेपर्यंत समाजाला सर्व सोयी, सुविधा दिल्या जात आहेत, अशी माहिती पालकमंत्री शंभूराज देसाई (Shambhuraj Desai) यांनी येथे पत्रकार परिषदेत दिली. दरम्यान, एकनाथ शिंदेंच्या (Eknath Shinde) नेतृत्वाखालील सरकार दीड कोटी लाभार्थ्यांपर्यंत पोचले आहे. मात्र, उद्धव ठाकरे मुख्यमंत्री असताना कधीच शेतकऱ्यांच्या बांधावर गेले नाहीत. ते ऑनलाइन मुख्यमंत्री होते, अशी टीका त्यांनी केली.

उद्धव ठाकरेंनी नगर दौऱ्यात शासन आपल्या दारी योजनेवरून मुख्यमंत्री शिंदेंवर टीका केली आहे. त्या टीकेला उत्तर देण्यासाठी पालकमंत्री शंभूराज देसाई यांनी शासकीय विश्रामगृहात पत्रकारांशी संवाद साधला. शंभूराज देसाई म्हणाले, ‘‘दुष्काळाबाबत आमचे सरकार संवेदनशील असून, त्याला कसे तोंड द्यायचे याचे नियोजन केलेले आहे. उद्धव ठाकरे यांनी शासन आपल्या दारी उपक्रमावर आक्षेप घेत टीका केली असून, त्यांचे वक्तव्य निराधार आहे.

ते जाणीवपूर्वक टीका करत आहेत. आमचे सरकार दीड कोटी लाभार्थ्यांपर्यंत पोचले आहे. ते मुख्यमंत्री असताना कधीच शेतकऱ्यांच्या बांधावर गेले नाहीत. ते ऑनलाइन मुख्यमंत्री होते. महाविकास आघाडीच्या सरकारमध्ये आम्हीही होतो. त्या वेळी ते मुख्यमंत्री असताना प्रत्येक जिल्ह्यात जाऊन आपण तेथील प्रश्न सोडवू, असे सांगितले होते; पण त्यांनी आमचे ऐकले नाही. आता मुख्यमंत्री एकनाथ शिंदे गावागावांत पोचले आहेत.’’

वैयक्तिक लाभांच्या योजना लोकांना घरापर्यंत मिळाल्या आहेत. आमच्या चांगल्या उपक्रमाकडे जनतेचे लक्ष जातेय म्हणून ते टीका करत आहेत, असे त्यांनी स्पष्ट केले. मराठा आरक्षणाच्या प्रश्नावर शंभूराज देसाई म्हणाले, ‘‘जरांगे पाटील यांच्या आग्रहानुसार कुणबी दाखले देण्याबाबत विधी व न्याय विभागाचे मत घेऊनच शासन निर्णय घेतला आहे. या निर्णयात सुधारणा करावी, अशी त्यांची मागणी आहे. शासन स्तरावर विचार विनिमय सुरू आहे.

पालकमंत्री पत्रकारांवरच भडकले...

सरकार सकारात्मक आहे. इतर समाजाच्या आरक्षणाला धक्का न लावता मराठा समाजाला आरक्षण दिले जाणार आहे. सुप्रिम कोर्टात रिव्हीव पिटीशन कोण मुख्यमंत्री असताना फेटाळली याची माहिती घेतली जात आहे. क्युरेटिव्ह पिटीशन सुनावणीला येईल, याची वाट पाहात असून, मराठा समाजाच्या आरक्षणाबाबत संवेदनशील असून, मराठा समाजाला आरक्षण मिळेपर्यंत गप्प बसणार नाही, असे मुख्यमंत्री एकनाथ शिंदेंनी स्पष्ट केले आहे. आरक्षण मिळेपर्यंत मराठा समाजाला सर्व सोयी, सुविधा दिल्या जात आहेत.

अजित पवारांच्या दौऱ्याची माहितीच नाही...

उपमुख्यमंत्री अजित पवार रविवारी साताराच्या दौऱ्यावर असून, त्यांचे तुम्ही स्वागत करणार का, या प्रश्नावर मंत्री देसाई यांनी मला अजित पवार यांच्या दौऱ्याची माहिती नाही, असे सांगितले. त्यांचा तो दौरा खासगी, की शासकीय याची माहिती घेतली पाहिजे. नाहीतर त्यांचे खासगी दौरे जिल्ह्यात असतातच असेही ते म्हणाले. त्यानंतर माजी सभापती रामराजे नाईक निंबाळकर यांनी अजित पवारांच्या दौऱ्याची माहिती दिल्याचे पत्रकारांनी सांगताच त्यांचा शासकीय दौरा असेल, तर उपमुख्यमंत्री म्हणून आम्ही त्यांचे स्वागत करू, असे त्यांनी स्पष्ट केले.