Rupali patil thombre: शिवतीर्थावर दसरा मेळाव्याच्या निमित्तानं झालेल्या शिंदे आणि ठाकरेंच्या भाषणांनी आता वेगळ्याच वादाला तोंड फुटले आहे. राजकारणातील वेगवेगळ्या नेत्यांनी यावर आपल्या प्रतिक्रिया दिल्या आहेत. आज भाजपचे ज्येष्ठ नेते नारायण राणे यांनी तर प्रेस कॉन्फरन्समध्ये शिवसेनेचे पक्षप्रमुख उद्धव ठाकरे यांच्यावर केलेले शाब्दिक हल्ले नेटकऱ्यांच्या चर्चेचा विषय आहे. त्यांनी एकेरी शब्दांत ठाकरेंचा उल्लेख करुन यापुढे एकनाथ शिंदे यांच्या गटातील कोणत्याही मंत्र्यांविषयी वाईट बोललात तर पाहा... अशा शब्दांत ठाकरेंना तंबी दिली आहे.

यासगळ्यात राष्ट्रवादीच्या नेत्या रुपाली पाटील ठोंबरे यांनी केलेल्या ट्विटनं अनेकांचे लक्ष वेधून घेतले आहे. सध्या त्यांचे ट्विट चर्चेत आले आहे. जेव्हापासून दसरा मेळावा झाला आहे तेव्हापासून राज्याचे मुख्यमंत्री एकनाथ शिंदे आणि उद्धव ठाकरे यांच्या भाषणाची तुलना सुरु झाली आहे. त्यात उद्धव ठाकरे यांनी शिंदे यांच्या नातवाचा आपल्या भाषणात केलेला उल्लेख सध्या वादाच्या भोवऱ्यात सापडला आहे. त्यावरुन त्यांच्यावर अनेकांनी टीका केली आहे. शिंदे यांच्या मुलानं श्रीकांत शिंदे यांनी तर ठाकरेंना भावनिक पत्र पाठवून आपला राग व्यक्त केला आहे.

पुणे शहरातील चौकांमध्ये उद्धव ठाकरे यांच्या त्या वक्तव्याचा फलक लावून निषेध व्यक्त करण्यात आला आहे. यावेळी रुपाली पाटील यांनी ट्विट करुन आपली प्रतिक्रिया दिली आहे. त्यात त्या म्हणतात, बापा पासून नातवा पर्यंत राजकारण गेले -दुदैवच. पण पेरणार तेच उगवणार, नैतिकता सोडून वागले, बोलले की आपल्या भोगावे लागते. या पुढे राजकारणातील नैतिकता सोडू नका म्हणजे अशी वेळ कोणावर येणार नाही. राजकारणातील दर्जा राजकारणी लोकांनी जपावा मग सल्ले द्यावे. असेही त्यांनी त्या ट्विटमध्ये म्हटले आहे.