मुंबई : जे लोक निवडून येत नाही, ते लोक शिवसेना चालवत आहे. हा आजचा विषय नाही तर २० ते २५ वर्षांपासून सुरू आहे. निवडून आलेल्या आमदारांना पक्ष चालवायला घ्यायला पाहिजे होते. आम्हाला नीलम गोऱ्हे, संजय राऊत, अनिल परब, देसाई यांचा त्रास होता. संजय राऊत (Sanjay Raut) यांना एकही आमदार मतदान करणार नव्हता, असे शिवसेना समर्थित अपक्ष आमदार आशिष जयस्वाल (Ashish Jaiswal) म्हणाले.

आम्हाला मोठ्या प्रमाणात त्रास झाला. मात्र, आम्ही बेईमानी केली नाही. बेईमानी केली असती तर खासदार संजय राऊत निवडून आले नसते. एकही आमदार (MLA) संजय राऊत यांना मतदान करायला तयार नव्हता. मात्र, आम्ही पक्षाकडे बघून संजय राऊत यांना मतदान केले, असेही आशिष जयस्वाल म्हणाले.

छातीवर दगड ठेवून आम्ही बंड करण्याचा निर्णय घेतला होता. कारण, त्रास वाढला होता. शासकीय निवासस्थान वर्षावरून उद्धव ठाकरे निघाले तेव्हा माझ्या डोळ्यात पाणी आले होते. आम्हाला असे काही करायचे नव्हते. मात्र, निवडून न आलेल्यांची हिंमत वाढली होती, असेही आशिष जयस्वाल (Ashish Jaiswal) म्हणाले.

मी २० तारखेलाच निघालो होतो. माझ्यासोबत सात ते आठ आमदार होते. मी जात असल्याचे उद्धव ठाकरे यांना माहीत झाले होते. त्यांनी मला फोन करून विचारले होते कुठे आहे. मी विमानतळावर असल्याचे सांगितले. तेव्हा त्यांनी म्हटले म्हणून परत आलो, असेही आशिष जयस्वाल म्हणाले.

उद्धव ठाकरे यांनी आत्मचिंतन करण्याची गरज आहे. त्यांना भाजप नको होती तर कशाला लोकसभेत त्यांच्यासोबत गेले. याचा त्यांनी विचार करावा. नागपुरात आम्हाला कोणती मदत झाली नाही. आम्ही शिवसेना मोठी केली. मात्र, नीलम गोऱ्हे, संजय राऊत (Sanjay Raut), अनिल परब, देसाई यांच्यासारख्या नेत्यांमुळे त्रास वाढला होता. याकडे त्यांचे लक्ष नाही, असेही आशिष जयस्वाल (Ashish Jaiswal) म्हणाले.