कोल्हापूरः कोल्हापूरमध्ये शिवसेनेचं महाअधिवेशन सुरु आहे. या अधिवेशनात एकनाथ शिंदेंनी उद्धव ठाकरेंवर सडकून टीका केली. यांना खोके पुरत नाहीत, यांना कंटेनर लागतात. त्याचा मी साक्षीदार आहे, अशा शब्दात मुख्यमंत्र्यांनी टीकास्र डागलं.

एकनाथ शिंदे बोलताना म्हणाले की, शिवसेना अशीच मोठी झालेली नाही. रक्ताचं पाणी करुन घरावर तुळशीपत्र ठेवलं तेव्हा शिवसेना मोठी झाली. तुम्ही आले आणि आयत्या पिठावर रेघोट्या मारल्या. त्याही निट मारत्या आल्या नाहीत. असा कुठला पक्षाचा प्रमुख असोत का? आपल्याच नेत्याचा पानउतारा करायचा, मनोहर जोशी मुख्यमंत्री असताना त्यांना भर सभेतून व्यासपीठावरुन खाली उतरवायला लावलं. त्यांचं घर जाळायला माणसं लावली, हे कुणाचं कारस्थान. ज्याला ते काम सांगितलं, तो आपल्याबरोबर आहे.

''मी रामदासभाईंना सांगितलं. षण्मुखानंदमध्ये येऊ नका, तुमचाही मनोहरपंत करण्याचं चालू आहे. गजाभाऊ यांनाही कितीवेळा परत पाठवलं, हे त्यांना माहिती आहे. याच लोकांनी शिवसेना मोठी केली. हेच लोक बाळासाहेबांच्या खांद्याला खांदा देऊन काम करत होते. नारायण राणे, राज ठाकरे यांना का घालवलं. दरबारी राजकारण करणाऱ्यांनी कारस्थान करुन नेत्यांना त्रास दिला.''

एकनाथ शिंदे पुढे म्हणाले की, एखादा चांगलं भाषण करायला लागला तर त्याचं भाषण कट करायला लागतात. गुलाबरावांना त्याचा चांगला अनुभव आहे. आपल्याकडे असलेला माणूस चांगलं नेतृत्व सिद्ध करत असेल तर पक्ष नेतृत्वाने त्यांच्यामागे खंबीरपणे उभं राहिलं पाहिजे. तरच पक्ष मोठा होत असतो. दोन-चार टकल्यांना सोबत घेऊन पक्ष मोठा होत नाही. सोडून गेलेले लोक सोबत ठेवले असते तर शिवसेनेची सत्ता अनेकवेळा महाराष्ट्रात राहिली असती. परंतु स्वतःचा पक्ष संपवायला निघालेला पक्षप्रमुख मी बघिताल नाही.

'त्यांना' कंटेनर लागतात- एकनाथ शिंदे

उद्धव ठाकरेंचं नाव न घेता एकनाथ शिंदे म्हणाले की, त्यांना खोके पुरत नाहीत कंटेनर लागतात. त्याचा सर्वात जास्त साक्षीदार मी आहे. धनुष्यबाण आपल्याला मिळाल्यानंतर त्यांचं एक पत्र आलं. आम्हाला पक्षाच्या खात्यातील ५० कोटी हवेत. मी क्षणाचाही विचार न करता देऊन टाका म्हटलं. ५० खोकेंचे आरोप करता आणि ५० कोटी मागता? यांना जनाची नाही तर मनाची लाज वाटायला हवी. तुमच्यावरची संकटं ही या एकनाथ शिंदेने अंगावर घेतली आहेत. त्यामुळे बोलायच्या वेळी मी बोलणार, असा इशारा शिंदेंनी यावेळी दिला.