मुंबई : केंद्रातील मोदी सरकारला सत्तेपासून दूर करण्याकरता येत्या लोकसभा निवडणुकीसाठी विरोधकांनी इंडिया आघाडीची मोट बांधली आहे. या आघाडीत सामिल होण्यास वंचित बहुजन आघाडी इच्छुक आहे, पण या आघाडीनं त्यांना अद्याप कुठलाही प्रतिसाद दिलेला नाही.

त्यामुळं वंचितकडून आता लोकसभेची तयारी सुरु करण्यात आली आहे. प्रकाश आंबेडकर यांनी यासाठी पक्षाच्या राज्य कार्यकारिणीची उद्या बैठक बोलावली आहे. यामध्ये ३० जागांवर लढण्याबाबत निर्णय होण्याची शक्यता वर्तवली जात आहे. (Speed up movement of VBA for Lok Sabha election an emergency meeting has been called)

उद्या बोलावली तातडीची बैठक

माध्यमांतील वृत्तानुसार, वंचित बहुजन आघाडीच्या राज्य कार्यकारिणीची बैठक उद्या पार पडणार आहे. या बैठकीला कार्यकारिणीतील सर्व सदस्यांना हजेरी लावण्याचे आदेश प्रकाश आंबेडकर यांनी दिले आहेत. गेल्या २० दिवसांतील ही पक्षाची दुसरी बैठक आहे. या बैठकीत ३० जागांवर निर्णयाची शक्यता वर्तवली जात आहे. (Marathi Tajya Batmya)

लोकसभेच्या ३० जागांवर होणार निर्णय?

प्रकाश आंबेडकर यांनी कालच राष्ट्र सेवा दलाच्या कार्यक्रमात बोलताना आपला मानस बोलून दाखवला होता. इंडिया आघाडीची जर वंचितला सोबत घेण्याची इच्छा नसेल तर आम्ही लोकसभेच्या सर्व ४८ जागा लढवण्याची तयारी सुरु करत आहोत असं त्यांनी म्हटलं होतं. यापार्श्वभूमीवर आता वंचितची उद्या बैठक पार पडणार आहे. (Latest Marathi News)

जाहिररित्या पत्रव्यवहार केला

विधानसभा आणि लोकसभा निवडणुकीत अनुक्रमे महाविकास आघाडी आणि इंडिया आघाडीसोबत जाण्यासाठी वंचित बहुजन आघाडीनं जाहिररित्या पत्रव्यवहार करुन इच्छा व्यक्त केली होती. त्यावर दोन्ही आघाड्यांमधील नेत्यांकडून प्रकाश आंबेडकरांना सोबत घेण्याबाबत विचार सुरु असल्याचं म्हटलं होतं पण अद्याप यावर ठोस निर्णय होऊ शकलेला नाही.