बुलडाणा - उद्धव ठाकरे गट आणि एकनाथ शिंदेंची शिवसेना यांच्यातील आमदार अपात्रतेचा मुद्दा मागील अनेक दिवसांपासून रेंगाळला आहे. मात्र दोन्ही गटांकडून एकमेकांवर सातत्याने टीका करण्यात येत आहे. संजय राऊत यांनी केलेल्या टीकेला शिंदे गटाचे बुलडाण्याचे आमदार संजय गायकवाड यांनी चोख प्रत्युत्तर दिलं आहे.

संजय राऊत म्हणाले होते की, उद्धव ठाकरे कार्याध्यक्ष झाले, तेव्हा शिंदे ठाण्यात नगरसेवक होते. मग शिवसेना शिंदेंची कशी झाली? या टीकेला प्रत्युत्तर देताना संजय गायकवाड म्हणाले की, बाळासाहेबांनी शिवसेना स्थापन केली, तेव्हा उद्धव साहेब कुठे होते? उद्धव ठाकरेंचा आणि शिवसेनेचा काहीही संबंध नव्हता, ते तर बाळासाहेबांच्या मृत्यूची वाट पाहत होते. उलट बाळासाहेबांनी जो हिंदुत्वाचा विचार दिला. मात्र त्यांनी पूर्ण शिवसेना काँग्रेसच्या दावणीला बांधली.

दरम्यान बाळासाहेब असते तर असं झालं असतं का? असे सांगत शिवसेना ही आमदार आणि खासदारांच्या मतांच्या जोरावर स्वतंत्र स्थापन झालेली आहे. मेरिटवर आमचा पक्ष स्थापन झाल्याचा दावाही संजय गायकवाड यांनी केली.