भाजपचे खासदार गिरीश बापट यांच्या निधनानंतर पुणे लोकसभा पोटनिवडणुकीची चर्चा आता राजकीय वर्तुळात रंगली आहे. काँग्रेसने या जागेवर आपला उमेदवार देणार असल्याचं सांगितलं आहे. काँग्रेसकडून कसब्याचे आमदार रवींद्र धंगेकर निवडणूक लढण्याची शक्यता वर्तवली जात आहे. तर भाजपमधून तीन नावांवर चर्चा सुरू आहे. तर ही निवडणूक बिनविरोध होणार की नाही? अशी चर्चा सध्या राजकीय वर्तुळात सुरू झाली आहे.

ही निवडणूक बिनविरोध करण्यासाठी भाजपने जोरदार प्रयत्न सुरू केले आहेत. या लोकसभा पोटनिवडणुकीसंबधी अजित पवार यांनी मोठं वक्तव्य केलं आहे. अजित पवार यांच्या या विधानामुळे भाजपच्या प्रयत्नांना सुरुंग लागण्याची शक्यता आहे.

अजित पवार बोलताना म्हणाले की, माझ्या माहिती प्रमाणे लोकसभा निवडणुकीला एक वर्ष आणि काही महिने राहिले आहेत. रेकॉर्ड पाहिलं तर कमी वेळ शिल्लक असतानाही निवडणुका झाल्या आहेत. पण या निवडणुकीच्या संदर्भात निवडणूक आयोगच निर्णय घेईल. निवडणूक आयोगाने निर्णय घेतला तर सर्व राजकीय पक्ष एकत्र येतील आणि तेही निर्णय घेतील. तर मागील निवडणुकीत महाविकास आघाडीने निर्णय घेतला होता. तसाच यावेळीही घेतला जाईल, असं पवार यावेळी म्हणाले आहेत.

निवडणूक आयोगाने अजून पोटनिवडणुकीची घोषणा केली नाही. त्यामुळे त्यावर चर्चा करणं योग्य नाही. रितसर घोषणा झाल्यावर सर्व राजकीय पक्ष एकत्र येऊन ठरवतील. बिनविरोध निवडणूक होणार अशी चर्चा झालीच नाही, असंही अजित पवार यांनी यावेळी स्पष्ट केलं आहे.