मुंबई ः फोर्स, जंगली, कमांडो यांसारख्या चित्रपटातून अॅक्शन हिरो म्हणून आपली ओळख निर्माण केलेला अभिनेता विद्युत जामवाल याच्या 'खुदा हाफिज' या आगामी चित्रपटाचा दमदार ट्रेलर काल रिलीज झाला. त्याला रसिकांचा चांगला प्रतिसाद मिळत आहे. रोमँटिक अ‍ॅक्शन-थ्रिलर चित्रपटाच्या या ट्रेलरमध्ये विद्युत एका असहाय पतीच्या भूमिकेत दिसणार आहे, ज्याची पत्नी बेपत्ता झाली आहे. या ट्रेलरमध्ये विद्युतने आपल्या अभिनयाने आपले लक्ष वेधून घेतले आहे. या चित्रपटात अभिनेत्री शिवालिका ओबेरॉयदेखील मुख्य भूमिकेत दिसणार आहे.

Dil Bechara Review: दिल बेचारा...जीवनात आनंद पेरणारा -

'खुदा हाफिज' ही एक अशी जोडप्यांची कहाणी आहे ज्यांनी उत्तम करियरच्या शोधात परदेशात काम करण्याचा निर्णय घेतला. या चित्रपटात विद्युत समीरची भूमिका साकारताना दिसणार आहे, तर शिवालिका नरगिसच्या म्हणजेच समीरच्या पत्नीच्या भूमिकेत दिसणार आहे.  ट्रेलरमध्ये पाहिल्याप्रमाणे, नरगिस रहस्यमय परिस्थितीत बेपत्ता होते. बेपत्ता होण्याआधी तिचं फोनवर शेवटचं बोलणं समीरशी होतं. एका असहाय्य पतीप्रमाणेच समीर आपल्या पत्नीचा शोध घेण्यास सुरवात करतो आणि नंतर तिला शोधण्यासाठी त्याला काय काय करावं लागतं हे या सिनेमात दाखवलं आहे.

मुकेश छाबरा म्हणतात; 'दिल बेचारा'ची स्क्रीप्ट न वाचताच सुशांत सिंहने दिला होकार

     'कमांडो' सारख्या चित्रपटात जबरदस्त अॅक्शन  दाखविणारा विद्युत या सिनेमातही एका वेगळ्या प्रकारच्या अ‍ॅक्शन अवतारात दिसणार आहे. तसंच अॅक्शनसोबत या चित्रपटातील या जोडप्यामधील प्रेमळ क्षणही लक्ष वेधून घेतात. या चित्रपटाचे दिग्दर्शन फारूक कबीर यांनी आहे.  'रेड', 'स्पेशल 26' आणि 'ओमकारा' सारख्या चित्रपटांची निर्मिती करणारे कुमार मंगत पाठक हे या चित्रपटाचे निर्माते आहेत.  'खुदा हाफिज' हा चित्रपट 14 ऑगस्ट रोजी डिस्नी प्लस हॉटस्टारवरून प्रेक्षकांच्या भेटीला येईल.
---------------------------------------------------

Edited By Tushar Sonawane