कॉमेडियन भारती सिंग-लिंबाचिया(Bharti Singh-Limbachiyaa) आणि तिचा नवरा हर्ष लिंबाचिया यांनी एक व्हिडीओ शूट करून 'लाइफ ऑफ लिंबाचिया' या यू ट्युब चॅनलवर पोस्ट केला आहे. त्या व्हिडीओत ते त्यांच्या मोठ्या कुटुंबाचे स्वप्न रंगवताना दिसत आहेत. या मोठ्या कुटुंबाच्या ध्येयापोटी भारतीचा नवरा हर्ष तिच्याकडे तब्बल चार मुलं आपल्याला हवी आहेत अशी मागणी करताना दिसत आहे. पण यामुळे गोंधळलेल्या भारतीचे चेहऱ्यावरचे भाव आणि यावरनं नवऱ्यासोबत तिनं घातलेला वाद मात्र पाहणाऱ्याला पोट धरुन हसायला लावतील हे नक्की.

या चार मुलांच्या मोठ्या कुटुंबाचं स्वप्न पाहतानाच हे होणारे आई-वडील आपल्या मुलांच्या करिअरविषयीही चर्चा रंगवताना दिसत आहेत. तेव्हा भारतीही म्हणताना दिसतेय की,''पहिल्या मुलाच्या जन्मानंतर आई-वडील म्हणून सुरू होणारी नवी जर्नी एन्जॉय केली तर लगेच एक-दोन वर्षात दुसऱ्या बाळाचा विचार माझा नवरा हर्ष करीत आहे''. आता हे सरळधोपट सांगेल तर ती भारती कसली. तिनं अगदी मजा घेत ही बातमी दिली आहे. ''मुलं जन्माला घालणं म्हणजे डाळ,भाजी बनवण्यासारखी गोष्ट नाही. किंवा आवडली म्हणून भरपूर घ्यायची असंही नाही. थोडक्यात मजा असते''. तसंच पुढे भारती म्हणालीय,''मी इतके महिने घरी बसू शकत नाही,मला करिअर आहे,मी स्वतंत्र विचारांची मुलगी आहे. माझा अधिकार मी कुणाला असा हिसकावून घेण्यास देणार नाही''.

तेव्हा तिला या बोलण्यावर थांबवत हर्ष म्हणतो कसा,''तुझ्या आईला किती मुलं आहात तुम्ही?'' लग्नाला चार वर्ष झाल्यावरही हर्षला हे माहित नाही पाहिल्यावर पहिल्यांदा तर भारती त्याच्यावर भडकते पण नंतर मात्र ती म्हणते,''तीन''. तेव्हा हर्ष म्हणतो कसा,''मग तुला आपल्या आईच्या पुढे एक पाऊल टाकत चार मुलांना जन्म द्यायला हवा''. पण त्यावर लगेच भारतीचं प्रत्युत्त असतं,''माझ्याकडे तेवढा वेळ नाही. मी माझ्या आईशी स्पर्धा नाही करू शकत. आई ही आईच्या जागी महान असते. माझ्या आईकडे भरपूर वेळ होता मुलांना सांभाळायला,माझ्याकडे नाही''. आता हा या नवरा-बायकोत रंगलेला वाद प्रत्यक्ष पाहताना तुम्हाला धमाल येईल एवढं मात्र नक्की. बातमीत तो व्हिडीओ जोडला आहे,नक्की पहा.