Kiran Mane News: किरण माने हे सोशल मीडियावर कायमच सक्रिय असतात. माने त्यांच्या आयुष्यात घडलेले विविध अपडेट्स शेअर करत असतात. अशातच किरण मानेंनी त्यांना आलेला एक भन्नाट अनुभव शेअर केलाय.

किरण मानेंना राजगृहाबाहेर भेटलेल्या एका नवविवाहीत जोडप्याचा अनुभव शेअर केलाय. हा अनुभव शेअर करुन माने लिहीतात, ...एक लै भारी घटना घडलेली तुमच्याशी शेअर करावी वाटतीय. राजगृहासमोर उभा होतो. तिथं नेहमी अनेक लोक राजगृहाच्या कुतुहलानं जमा झालेले असतात. तिथं मला बघितल्यावर "जय भीम किरण माने सर... एक सेल्फी द्या ना प्लीज" असं म्हणत गर्दी जमा व्हायला लागली...

किरण माने पुढे लिहीतात, "एक नवविवाहित जोडपं मागं घुटमळत होतं. सगळ्यांचे सेल्फी झाल्यावर त्यातला मुलगा माझ्याजवळ आला. म्हणाला, "सर, आम्हा दोघांना सेल्फी आणि आशिर्वाद द्या." मग मला कळलं की, दोन दिवस आधीच त्यांचा मंगल परीणय झाला होता. नवरीमुलगी पयल्यांदाच मुंबैला आली होती. तिची लै इच्छा होती की आपण सहजीवन सुरू करताना आधी जोडीनं 'राजगृहा'चं दर्शन घ्यायचं."

किरण माने पुढे लिहीतात, "संसार सुरू करण्यापुर्वी, जिथं बाबासाहेब-रमाई जोडीच्या वास्तव्याचा दरवळ आहे, तिथं दोघांनी मिळून तो अनुभवायचा !
म्हणून तो तिला तिथे घेऊन आला होता.
कस्लं भारीय हे भावांनो... कस्लं रोमॅंटिक !"

किरण माने शेवटी लिहीतात, "लै मस्त वाटलं. पंचवीशीतल्या त्या जोडीला आत्ता या वास्तूचं महत्त्व कळतंय... म्हणजे यांची पुढची पिढी आपल्या महामानवांच्या संघर्षाविषयी सजग असणार यात शंकाच नाही.

दोघांनाबी अगदी मनापास्नं सदिच्छा आणि काळजाच्या तळापास्नं लै लै लै प्रेम दिलं. 'राजगृहा'त येणं अशा पद्धतीनं 'साजरं' झाल्याच्या समाधानात मी परतीच्या प्रवासाला निघालो..."