सिल्लोड (जि.औरंगाबाद ) : औरंगाबाद (Aurangabad) -जळगाव राष्ट्रीय महामार्गावरील अजिंठा गावाजवळ गुरुवारी (ता.२४) पहाटेच्या सुमारास धावत्या बसने पेट घेतल्याने बस जळून खाक झाली. सुदैवाने बसचालक, वाहकासह बसमधील २८ प्रवासी सुखरूप असून, परिसरातील नागरिकांसह अजिंठा पोलिसांनी वेळीच धाव घेऊन आग आटोक्यात आणली. घटनेची माहिती अशी की, पुणे येथून मलकापूरकडे जाणारी श्री साई राम ट्रॅव्हल्सची बस (एमएच १२ इक्यू ९००७) अजिंठा (Ajanta) गावालगत आली. (Running Bus Catch Fire On Aurangabad Jalgaon Highway , 28 Passengers Safe)

येथे महामार्गावरील भारत दर्शन हॉटेल जवळील वळणावर बसच्या टायरचे लायनर चिटकुन टायर फुटल्याने बसला पहाटे पाच वाजेच्या सुमारास आग लागली. आग लागल्याचे कळताच चालकाने प्रसंगावधान राखून बस रस्त्याच्या बाजूला घेत बसमधील २८ प्रवाशांना उतरविल्याने सुदैवाने जीवितहानी टळली. घटनेत बस संपूर्णपणे जळून खाक झाली.