माजलगाव - प्रशासकीय काळात नगरपालिकेत मोठ्या प्रमाणात अनागोंदी कारभार झाल्याचा आरोप करत राष्ट्रवादी कॉंग्रेस पक्षाच्या वतीने ता. १८ रोजी जागरण गोंधळ आंदोलन माजी नगराध्यक्ष शेख मंजूर यांच्या नेतृत्वात करण्यात आले.

(लोकल ते ग्लोबल लेटेस्ट अपडेट मिळवा सकाळच्या व्हॉट्सअप चॅनेलवर फक्त एका क्लिकमध्ये)

शहरामध्ये विविध समस्या निर्माण झाल्या असून पालिका प्रशासनाचे याकडे दुर्लक्ष होत आहे. मंजरथ रोडवरील फातिमा नगर येथील पाण्याच्या टाकीचे बंद पडलेले काम सुरू करावे, शहरात स्वच्छता नसल्याने डेंगीसारखे आजार वाढत आहेत. त्यामुळे नाल्या स्वच्छ कराव्यात.

आजारांचा प्रादुर्भाव रोखण्यासाठी प्रभाग एक ते बारामध्ये डीडीटी फवारणी करावी. मुख्य रस्त्यावरील मोकाट जनावरांचा वावर वाढला आहे. त्यामुळे पादचाऱ्यांना जीव मुठीत धरून जावे लागते. यातून अनेक दुर्घटना घडल्या आहेत. आझाद नगर, गौतम नगर, कचारवाडा, रहमत नगर, कुरेशी गल्ली, पॉवरहाउस रोड, बिलाल मोहल्ला याठिकाणी वास्तव्यास असणाऱ्या नागरिकांच्या नोंदी मालकी हक्कात घ्या यासह विविध मागण्यांसाठी आंदोलन करण्यात आले.

आंदोलनात दयानंद स्वामी, नारायण डक, कचरू खळगे, डॉ. सरवदे, शकील कुरेशी, मनोज फरके, नुमान चाउस, टी. आर. जावळे, अनिल साळवे, राम भोले, राणा कुरेशी, फेरोज कुरेशी आदी सहभागी झाले होते. आंदोलन मागे घेण्यात यावे यासाठी पालिकेच्या वतीने कार्यालयीन अधीक्षक गणेश डोंगरे यांनी माजी नगराध्यक्ष शेख मंजूर यांना पत्र दिले.यानंतर आंदोलन स्थगित करण्यात आले.