माजलगाव (बीड) - घरी अठरा विश्वे दारिद्र्य, कुटुंबात चार मुली. मोठ्या मुलीचे लग्न ठरले; परंतु हलाखीची परिस्थिती असल्याने गायकवाड कुटुंबीयांना मुलीचा विवाह चक्क राजस्थानी स्मशानभूमीतच करावा लागला. या वेळी स्मशानभूमीत सनईचे सूर निनादले. हा आगळावेगळा विवाह माजलगावात सोमवारी (ता. २५) पार पडला.

शहरातील राजस्थानी स्मशानभूमीत गंगाधर गणपत गायकवाड राहतात. या स्मशानभूमीला राजस्थानी वैकुंठधाम नाव दिलेले आहे. स्मशानभूमीतच हे कुटुंब वास्तव्यास आहे. गंगाधर गायकवाड यांना चार मुली आहेत. मोठी मुलगी भारतीचे लग्न ताडकळस येथील व्यंकटराव पवार यांचे चिरंजीव ज्ञानेश्वर यांच्यासोबत ठरले. लग्नाचा मुहूर्त सोमवारचा ठरला. मंगल कार्यालयात लग्न करणे शक्‍यच नव्हते म्हणून त्यांनी राजस्थानी स्मशानभूमीत हे लग्न करण्याचा निर्णय घेतला. माजलगावमध्ये प्रथमच स्मशानभूमीत हा शुभविवाह झाला. 

...यांनी दिला मदतीचा हात
विवाह सोहळ्याला ब्युटी पार्लर संघटनेच्या अध्यक्षा जान्हवी जाधव, शोभा वर्मा, नगरसेविका राजश्री मुंदडा, कांचन अकोलकर, मालती राऊळ, मीनाक्षी मोराळे, तृप्ती काटकर, वैशाली रिंगणे, वैशाली औटे, पूजा गिरी, रूपाली भोगावकर, अर्चना जाधव, कोमल वर्मा, अनिता चांडक, अर्चना बोरा यांनी संसारोपयोगी साहित्य देत मदतीचा हात दिला.

कसले मंगल कार्यालय अन्‌ कसली रोषणाई. आम्हाला स्मशानभूमीच सर्व काही...घरची परिस्थिती तशी जेमतेमच आहे. कमाईचे साधन तसे तुटपुंजेच. समाजातील दानशुरांच्या सहकार्यामुळे भारतीचे लग्न थाटात झाले. 
- गंगाधर गायकवाड, वधुपिता.