औरंगाबाद - ‘एसटी कर्मचाऱ्यांचे पगार एवढे वाढलेत की ते वेडे झालेत’, असे वादग्रस्त विधान राज्याचे परिवहनमंत्री दिवाकर रावते यांनी औरंगाबाद येथे केले. 

महापालिका व एसटीतर्फे स्मार्टसिटी अंतर्गत चालवण्यात येणाऱ्या शहर बस संदर्भात झालेल्या कराराची माहिती रावते यांनी दिली. त्यानंतर ते पत्रकारांशी बोलत होते. गतवर्षी ऐन दिवाळीत एसटी कर्मचाऱ्यांनी पगारवाढीसाठी संप पुकारला होता. त्या वेळी महामंडाळाचे कोट्यवधींचे नुकसान तर झालेच; पण नागरिकांचेही प्रचंड हाल झाले होते. यासंदर्भात एसटी कर्मचाऱ्यांच्या पगारवाढीबाबत पत्रकाराने प्रश्‍न विचारताच रावते यांनी संताप व्यक्त केला. ‘एसटी कर्मचाऱ्यांचे पगार एवढे वाढलेत की ते वेडे झालेत’ असे वादग्रस्त विधान या वेळी रावते यांनी केले. ‘हे मी अधिकृतपणे बोलतोय’, असे सांगायलाही ते विसरले नाहीत. जादा काम करणाऱ्या एसटी कर्मचाऱ्यांना आम्ही अतिरिक्त कामाचे पैसेही देत आहोत, असेही रावते यांनी स्पष्ट केले.