मुंबई - BMC चा अर्थसंकल्प आज सादर करण्यात आला. आतापर्यंतचा इतिहासातील हा सर्वात मोठा अर्थसंकल्प ठरला. ४५ हजार ९४९ कोटी रुपयांचा अर्थसंकल्प सादर केला गेला. गेल्या वर्षीच्या तुलनेत १७.७० टक्यांची वाढ झाली आहे. गेल्या वर्षी ३९ हजार कोटींचा अर्थसंकल्प सादर करण्यात आला होता. आता अर्थसंकल्पावरून भाजपचे नेते अतुल भातखळकर यांनी टीका केली आहे. बीएमसीचा अर्थसंकल्प म्हणजे बोगस बजेट असल्याचं त्यांनी म्हटलं. (BMC Budget 2022)

अतुल भातखळकर म्हणाले की, शिवसेनेची सत्ता असलेल्या बीएमसीचा अर्थसंकल्प म्हणजे बोगस बजेट, भांडवली खर्च ४० टक्केही करता आला नाही. कोस्टल रोडवर खर्च केला, कॅगने ताशेरे मारलेत तरी विनाकारण पेमेंट केल्याचंही भातखळकर यांनी म्हटलं. आंतरराष्ट्रीय शाळा उभारणार याच्या नावाखाली मराठी शाळा विकण्याचा घाट शिवसेनेनं घातल्याचं भातखळकरांनी म्हटलं. तोंडाला पानं पुसणारा आणि भ्रष्टाचाराला वाव देणारा हा अर्थसंकल्प असल्याचा घणाघात भातखळकरांनी केला.

निवडणुका आहेत म्हणून कर वाढवला नाही असं सांगण्यात आलं पण कोरोनामुळे कर वाढवूच शकला नाहीत. आम्ही दबाव टाकल्यानं कर तसाच ठेवलात. खरं तर कमी करण्याची आवश्यकता होती. सर्वसामान्य मुंबईकराची वाट लावणारा अर्थसंकल्प असल्याचंही भातखळकर म्हणाले.

शिक्षण विभागाचा ३३७० कोटींचा अर्थसंकल्प

शिक्षण विभागाचा 2022-23 या वर्षाचा 3 हजार 370 कोटी रुपयांचा अर्थसंकल्प आज सह आयुक्त अजित कुंभार यांनी शिक्षण समिती अध्यक्षा संध्या दोशी यांना सादर केला.या अर्थसंकल्पात मैदानांचा विकास,क्रिडा संकुल तयार करणे यासाठी विशेष घोषणा करण्यात आली आहे.