मुंबईः लाडक्या बाप्पांना रविवारी दीड दिवस पूर्ण होताच भावपूर्ण वातावरणात निरोप देण्यात आला. दरवर्षीप्रमाणे यंदा  ना ढोल-ताशांचा गजर, ना गुलालाची उधळण, ना फटाक्यांची आतषबाजी, ना भलीमोठी मिरवणूक पाहायला मिळाली. कोरोनाचे संकट दूर ठेवण्यासाठी अनेक कुटुंबांनी घरातच गणेशमूर्तीचे विसर्जन करण्याला प्राधान्य दिलं तर, मोठमोठी मंडळे आणि गृहनिर्माण संस्थांनी देखील यंदा दीड दिवसातच गणेशोत्सव आटोपता घेतल्याचं चित्र पाहायला मिळालं.

कोरोना साथीचे संकट असल्यामुळं यंदा गणेशोत्सवाच्या आनंदावर विरजण पडले आहे. त्यामुळं सोशल डिस्टन्सिंग आणि शांततेत गणेश मूर्तींचे विसर्जन करण्यात आले. मुंबई महापालिकेनं नियमांचं उल्लंघन होऊ नये म्हणून कृत्रिम तलावांची सोय केली आहे. 

दीड दिवसाच्या गणपतीचे विसर्जन घरापासून जवळ असावं म्हणून मुंबई महापालिकेनं शिवाजी पार्क येथे सोसायटीच्या दारात वाहन आरोहीत विसर्जन हौद उभा केला होता. मुंबईत दीड दिवसाच्या गणपतीचे मुंबईतील दादर येथील कृत्रिम तलावात विसर्जन करण्यात आलं. तसंच गणेश मूर्तींच्या विसर्जनासाठी विशेष फिरत्या कृत्रिम हौदांची निर्मिती करण्यात आली होती. विसर्जनासाठी मोजक्याच व्यक्तींना प्रवेश दिला जात होता. विसर्जनासाठी फुलणारी दादर चौपाटी यंदा सुनीसुनी होती.

हेही वाचाः  सॅनिटायझरचा वारंवार उपयोग करत असाल तर वेळीच सावध व्हा; त्वचेची गंभीर अँलर्जी होण्याची शक्यता

मुंबईत शनिवारी गणरायाचे मोठ्या उत्साहात घरोघरी आगमन झाले होते.  अनेकांच्या घरी परंपरेनुसार दीड दिवसांच्या गणपतीचे आगमन झाले होते. काल दुसऱ्या दिवशी दुपारनंतर दीड दिवस पूर्ण होताच या गणपती मूर्तीचे विसर्जन करण्यात आले.

अधिक वाचाः  जरा सांभाळून! मुंबईत सील केलेल्या इमारतींचा आकडा वाढतोय,आकडा बघून व्हाल हैराण

सायंकाळी ६ वाजेपर्यंत दीड दिवसांच्या ३१ हजार २५५ गणेश मूर्तींचे विसर्जन करण्यात आले. त्यापैकी ४२२२ मूर्तींचे कृत्रिम तलावात विसर्जन करण्यात आले. त्यात सार्वजनिक ६२१, घरगुती ३० हजार ६३४ गणेश मूर्तीचे विसर्जन करण्यात आले होते. दरम्यान, महापालिकेने गणपती विसर्जनासाठी चोख व्यवस्था ठेवली होती. तर ठाणे जिल्ह्यात यंदा प्रतिष्ठापना करण्यात आलेल्या सव्वा लाख गणेशमूर्तीपैकी ४० हजारांहून अधिक गणेशमूर्तीचे रविवारीच विसर्जन पार पडले.

Ganpati Visarjan 2020 one and half days ganpati immersion mumbai thane