शिवसेना पक्षप्रमुख आणि माजी मुख्यमंत्री उद्धव ठाकरे यांचा आज वाढदिवस आहे. त्यानिमित्ताने मातोश्रीवर शिवसैनिकांनी गर्दी केली आहे. मात्र सर्वात जास्त चर्चा आहे ती म्हणजे मुख्यमंत्री एकनाथ शिंदे यांनी दिलेल्या शुभेच्छांची. त्यांनी उद्धव ठाकरेंचा उल्लेख शिवसेना पक्षप्रमुख असा न करता माजी मुख्यमंत्री असा केला आहे. (CM Eknath Shinde Wishes Happy Birthday to Uddhav Thackeray)

शिवसेनेतून ऐतिहासिक बंड करुन वेगळे झालेले एकनाथ शिंदे (Eknath Shinde) गेल्या अनेक महिन्यांपासून चर्चेत आहेत. आत्ताही ते पुन्हा एकदा चर्चेत आले आहेत. आपल्या ट्वीटमध्ये एकनाथ शिंदे म्हणतात, "महाराष्ट्राचे माजी मुख्यमंत्री माननीय उद्धवजी ठाकरे यांना वाढदिवसाच्या हार्दिक शुभेच्छा. त्यांना निरोगी दीर्घायुष्य लाभो हीच आई जगदंबेच्या चरणी प्रार्थना."

या शुभेच्छांनंतर मात्र चर्चांना उधाण आलं. उद्धव ठाकरेंचा उल्लेख एकनाथ शिंदेंनी शिवसेना पक्षप्रमुख न करता माजी मुख्यमंत्री असा केला. याविषयी एकनाथ शिंदेंना प्रश्न विचारण्यात आला. मात्र, या प्रश्नाचं उत्तर देणं शिंदेंनी टाळलं आणि तिथून निघून गेले. मी उद्धव ठाकरेंना वाढदिवसाच्या शुभेच्छा दिल्या, एवढंच शिंदे म्हणाले.