मुंबई : मुंबईहून छत्रपती संभाजीनगरला निघालेल्या इंडिगो एअरलाइन्सच्या विमानाचे पार्किंग ब्रेक फेल झाल्याचे वैमानिकाच्या लक्षात आल्याने ‘टेक ऑफ’ होणारे विमान ऐनवेळी थांबविण्यात आले आणि पुढचा अनर्थ टळला.

सोमवारी (ता. ११) सायंकाळी साडेसातच्या सुमारास ही घटना घडल्यानंतर विमानाची फेरी रद्द करण्यात आली.

विमानाचे ‘टेक ऑफ’ झाले असते, तर मोठी दुर्घटना घडली असती. विमानात विशेष सरकारी वकील उज्ज्वल निकम छत्रपती संभाजीनगरला जाण्यासाठी निघाले होते. दुर्घटनेबाबत त्यांनी ‘सकाळ’ला माहिती दिली. (Indigo planes parking brake failed at Mumbai airport accident avoided defect noticed in time Mumbai News)

विमानात १५० प्रवासी

मुंबई विमानतळावरून इंडिगो एअरलाइन्सचे विमान १५० प्रवासी घेऊन छत्रपती संभाजीनगरला जाण्यासाठी ‘टेक ऑफ’साठी सज्ज होते. विमान धावपट्टीवरून उडण्यासाठी तयार होत असतानाच त्याचे टायर फुटले.

त्यामुळे ते थांबविण्यात आले. टायर बदलून पुन्हा उडण्यासाठी ते सज्ज झाले. मात्र ‘टेक ऑफ’ करण्याच्या आधीच विमानाचे पार्किंग ब्रेक फेल झाल्याचे वैमानिकाच्या लक्षात आले. वैमानिकाने आवश्यक त्या सूचना प्रवाशांना देण्याचे सांगून विमान थांबवले.

त्यामुळे पुढचा अनर्थ टळला. वैमानिकाने प्रसंगावधान दाखवल्याने मोठी दुर्घटना टळली. त्यामुळे विमानातील प्रवाशांनी सुटकेचा निःश्‍वास सोडला.

"विमानात एकाचवेळी दोन त्रुटी होत्या. त्या वेळीच लक्षात आल्याने अनर्थ टळला. ‘टेक ऑफ’ झाल्यानंतर दोष लक्षात आला असता, तर मोठी दुर्घटना घडली असती. आम्ही सारे प्रवासी वाचलो."- ॲड. उज्ज्वल निकम, विशेष सरकारी वकील