अंधेरी : मालाड (malad) येथे एका इस्टेट एजंटने (Estate Agent) आपल्या राहत्या घरी गळफास घेऊन आत्महत्या (suicide) केल्याची घटना घडली. इसराल जलील खान असे त्याचे नाव असून, त्याच्या घरी पोलिसांना तीन पानी चिठ्ठी (suicide note) सापडली आहे. आर्थिक वादातून आलेल्या नैराश्यातून (financial depression) त्याने आत्महत्या केल्याचे बोलले जाते. याप्रकरणी मालवणी पोलिसांनी (malwani police) तिघांविरुद्ध आत्महत्येस प्रवृत्त केल्याप्रकरणी गुन्हा दाखल (FIR) केला आहे.

इसराल हा मालाडच्या मालवणी परिसरात राहत होता. तिथेच तो इस्टेट एजंटचे काम करीत होता. काही दिवसांपूर्वी त्याने एका रूमचा खरेदी-विक्रीचा व्यवहार केला होता. त्यात त्याला १९ लाख रुपये मिळाले होते. ही रक्कम त्याने काही ठिकाणी गुंतविली होती. याच दरम्यान रूमचा हा व्यवहार रद्द झाला आणि संबंधित व्यक्तीने त्याच्याकडे पैशांसाठी तगादा लावला होता. त्यानंतर त्याने दहा लाख रुपये देऊन उर्वरित रक्कम लवकर देण्याचे मान्य केले होते; मात्र त्याला ही रक्कम परत येत नव्हती.

याच कारणावरून त्यांच्यात काही दिवसांपासून वाद सुरू होता. त्यातून आलेल्या नैराश्यातून इसराल याने शुक्रवारी रात्री उशिरा त्याच्या राहत्या इमारतीच्या टेरेसमध्ये गळफास लावून आत्महत्या केली. हा प्रकार नंतर स्थानिकांकडून समजताच मालवणी पोलिसांनी घटनास्थळी धाव घेतली होती. त्याला पोलिसांनी तातडीने कांदिवलीच्या भगवती रुग्णालयात दाखल केले. तिथे त्याला डॉक्टरांनी मृत घोषित केले. घटनास्थळी पोलिसांना एक चिठ्ठी सापडली असून, त्यात त्याने तिघांची नावे नमूद केली आहेत. तिघांविरुद्ध शनिवारी पोलिसांनी गुन्हा नोंदविला आहे.